Shillong, Jymmang 15: U myntri rangbah ka jylla u la leit ban buh mawnongrim ia ka jingshna ia ka Indigenous Cultural Centre jong ka seng Khasi kmie kaba don ha Mawkhar, ha ka jinglut kaba la kot sha ka T.15/- klur tyngka.
Ha kane ka sngi buh mawnongrim jong ka jingshna ia ka Indigenous Cultural Centre la synran ia u myntri rangbah ka jylla u Conrad K Sangma da u symbud myntri rangbah u bah Prestone Tynsong, u myntri ka tnad Tourism u bah Paul Lyngdoh ki nongialam ka sengkhasi kmie bad ki khun ka sengkhasi.
U myntri rangbah ka jylla u Conrad K Sangma haba ai jingkren ha kane ka jingialang u la pynpaw ka jingsngewkmen kaba khraw ban ioh ban don bynta ban buh mawnongrim ia katei ka jingshna ba la pynmang da ka sorkar.
U Conrad K Sangma u la ong ba ban pynneh pynsah ia ka rukom im, ki jingiathuhkhana bad ka kolshore ka long kaba donkam shibun, ba lyngba kine ngi sa lah ban tip ngi dei kiei bad kata ka dei ka jinglong ba kyrpang jong ngi, kaba lah ruh ban pyniapher ia ngi na kiwei pat ki jaitbyndriew.
“Naduh u snem 2018 ka sorkar ka pyrshang katba lah don bun ki bunjait ki jait programme ban hikai ban pynbha ban pyntip sha ka pyrthei ia ka jinglongkyrpang ki riti dustur bad ka kolshor ki ba don ha ka jylla jongngi” la ong u Conrad K Sangma.
U Conrad K Sangma u la ong ba da la dep ia kane ka jingshna kan long kawei na ki jaka ba lah ban lum bad ban pynneh pynsah ia ka jinglongkyrpang kan long ruh ka jaka ka ban khring ia ki nongwan jngohkai pyrthei na kylleng, kane ka Indigenous Centre kan long kaba heh duh haka jylla.
