Shillong, Naitung 17: Mynta ka sngi, u Syiem ka Hima Nongkhlaw u pa,im PM Syiemlieh, u bah Metbah Lyngdoh lamphang ka iing dorbar thaw ain ka jylla, ki seng bhalang bapher bapher, kum ka HYC, HITO, KSU, HNAM bad kiwei kiwei de kila leit ban buh syntiew ha khmat u dur mot jong u Syiem Tirot Sing Syiem ha kane ka lyngkhuh sngi iap kaba 186 mynta ka sngi.
Ka seng HITO kala buh ia u Syntiew ha khmat dur mot bala shna da ka sorkar ha State Central Library, ha ka kyrwoh ka seng kala ong ba ka jingwan long doh u riew ieid ri’ bad ka da shong sbai shisha ha ba ngi kynmaw burom ia u Khlawait ka Ri, Paiem U Tirot Sing Syiem ha ka lyngkhuh sngi iap kaba 186 mynta ka sngi.
Kum ka dak jingai burom da kaba sngewrit ia une u riewkhraw, ki nongialam bad dkhot ka HITO ki la ia leit buh syntiew ha u mot sahnam jong u bad phah ruh kane ka kyrwoh sha ka sorkar.
Na ka Liang ka HYC Seng kmie ha ryngkat ka HYC West Khasi Hill District , ka North West Khasi Hill District, Mairang Circle bad ka Women wings Jong ka north west khasi hill ka la pynlong ia ka jingkynmaw burom ia u Tirot Sing Syiem ha Mairang mynta ka sngi. La pynlong ia ka Jingbuh syntiew , ka jingsngap jar ban puson bad kynmaw ieit ia u Tirotsing bad kumjuh ruh ka Jingialang ba lyngkhot.
Ia ka Jingialang La pyniaid, da u MacDonald Nongrang ( president Mairang Circle ) bad la ioh jingkren na U Wantei Lyngdoh ( GS ka WKHD) , Joplang kharnaior ( president North West khasi hill ), Donboklang kharlyngdoh ( VP HYC) bad u Robertjune Kharjahrin ( President HYC) .
U Donboklang kharlyngdoh u la ong ba ka Jaidbynriew Hynniewtrep ha ka nongialam u Tirotsing Syiem u la iakhun ia ka synshar donbor ki Dohlieh , mynta pat ngi hap ia Khun sa ia ki dohiong, ngi iakhun bad ki dohiong ha ka pule puthi, ka Kam ka jam , ka khaii pateng bad kumjuh ruh ban ioh ia ki Ain iada Ri kum ka ILP.
U President ka HYC u la pynpaw ba u Tirot Sing Syiem u dei u Syiem uba khraw bad u dei uba ieit Ri, u nongiakhun laitluid bad uba pyniatylli ia ka Jaidbynriew bad Lada ngi kynmaw ia u Tirotsing ngi dei ruh ban bud ia ki dienjat Jong u ban long kiba ieit Ri, kiba burom ia ka jinglait luid bad kiba ia tylli.
Haman ki nongiakhun ki jingialeh kumba don ki khwan sbai kiba shet kylla ha ki por u Tirotsing mynta ruh ki don. Ki Riew ieit sbai kim khein shuh ban lute bad Bamsap na ki paidbah wat hapdeng kane ka khlam. Kito kiba don kti ban Bamsap na ka MeECL , Saubhaya Scheme bad ki wei ki dptt ki long kum kito ki shipai tam pisa saw kiba shet kylla ia u Tirotsing.
U la pynkynmaw ruh ba mynshwa u Tirotsing u iakhun pyrshah ia ki phareng mynta ngi iakhun ban iada ia la ka Jaidbynriew Da kaba iakhun ban ioh ka ILP, ban pynbeit ia u pud u sam, ka jingpynrung ia ka ktien khasi ha ka eight schedule , ban beh noh ia ki Khar Metor na iew duh , ka jingpynkhlain ia ka sixth schedule bad ki Dorbar trai Ri bad kiwei de.
Na ka liang jong ka KSU kala leit ban buh Syntiew ha khmat ka dur mot jong u Syiem Tirot Sing Syiem ba don ha Mawdan Iewrynhep ha Laitumkhrah ia kaba la lam khmat da u president ka seng u samla Lambokstarwell Marngar, ha ka jingiadon lang kiwei kiwei ki dkhot jong ka seng.
Ha kane ka sngi bun na ki seng bhalang kila ia don bynta ruh ha ka jingrakhe kaba la pynlong ha shnong Nongkhlaw ha West Khasi Hills kaba dei ka shnong jong u Tirot Singh ha ka jingia don lang ki bor jong ka Hima.
