Mawkynrew, Kyllalyngkot 20: Ki paitbah jong ka Mawkynrew Mawlein ha ka step sngi nyngkong ki la mih ban leit sieh dieng kol ha ka madan kaba don ha umjar kaba don hapdeng ka jingiakynad ba ki nongshong ki pyrshah ban ai jaka shna ingskul ka Rama Krishna Mission. Ha kaba ki la kynnoh ba u Sordar Raid ka Mawkynrew Pyllun u donkti sop sop ban ai ia katei ka jaka.
Ha ka jingsakhi ki nongthoh khubor, ki bor pulit ki la pynkhlaiñ ban iada, ia ka jingthmu ki paitbah ban tur ban leit sieh dieng kol ha katei ka madan. Katto katne por kala don ka jingiapyni bor hapdeng ki paitbah bad ki bor pulit, tad haduh ba ki pulit ki la shim ia ka sienjam ban pynbthei da ki bomb pynsad khmat ban pynpra ia u paitbah ba ialum ha katei ka jaka.
Hynrei kane ka jingpyrshang ki bor pulit kam shym la lah ban pynpra ia u paitbah bad ki paitbah ki la ioh ban sieh dieng kol kumba ki thmu haktei ka jaka.
La sakhi ba ha kane ka jingia pyni bor la don ki ba mynsaw kumba 5 ngut ki kynthei kynthup iba armet bad 2ngut ki riew rangbah ki ba mynsaw na ka jingshah bom lathi ki bor pulit.
Ha ka jingiakren bad ki nongialam ka liang paitbah ba iakhih ki la kam ia katei ka jaka ka bor shnong ka la aiti ha ka Mawkynrew Sports Club ban pynlong madan ialehkai bol naduh u snem 2013 hadein ba la aiti ia katei ka jaka sha ka Sports club kam shym ladon kano kano ka dorbar paitbah jingpynkylla ba iaktei ka jaka la aiti hano re hano.
Ki shim ba katei ka jaka ka dang dei hi kaba ka bor shnong ka la dep ban aiti sha ka Sports Club Mawkynrew. Ki la ong ruh ba ka jingwan jongki ha katei ka jaka kam dei halor kiwei ki daw lane ban thaw jingpynkulmar hynrei ka dei ban leit sieh dieng kol ha katei ka madan.
U bah Phrangstarwell Wankhar u ba long kum Nongialam ka Sur U Paitbah Mawkynrew Mawlein u la pynpaw ba kiba trei ia ka building ka Rama Krishna Mission ruh ki dei ban sangeh bad ba kin mih noh na katei ka jaka, ka jingpynlongskul ruh dei ban sangeh noh mardor, bad ba lada don kano kano ka jingja, ka shnong kan nym don ka jingkitkhlieh.
Shuh shuh na ka liang Ka Sur Paitbah Mawkynrew Mawlein la pynpaw ba kin nym shongthait ban iakhun ban kin ioh ia ka hok lajong bad lada dei ban jaw ka snam ha madan, wat haduh ban dkut mynsiem ha katei ka madan ruh kin dang iai bteng ban iakhun khlem kynrandien.
Haba ioh ban iakren bad u Acting Sordar Raid Mawkynrew Pyllun u bah Kitborlang Mukhim uba dei peit ia ki arshnong ka Mawkynrew bad Mawlein u la pynksan ba ka rai ai jaka ka long hadien ka jingioh pdiang da ka jingthoh ba ka rai jong ki ar dorbar shnong kata na Mawkynrew bad Mawlein ban aiti iakatei ka jaka sha ka Rama Krishna Mission ban shna ingskul.
Kane ka jingpyrshah ai jaka sha ka Rama Krishna Mission kam dei shuh kaba thymmai. Hynrei, kadei kaba la neh kumba katto katne snem.