Shillong, Jymmang 10: Mynta ka sngi ki bor ba dei peit ia ka District Administration kila shem jingeh ban khang ia ki paidbah ban nym ia kiew sha iew namar ka don kane ka jingkhang dam hynrei wat ha pdeng ka jingpynsngewthuh ki paidbah kim sngap ia ki bor sorkar.
Ha Motphran ki pulit bad ki Magistrate kila ap ban khang ia ki paidbah hynrei ym don ba sngap ki paidbah na kylleng ki poi sha kane ka thain da kaba ai daw ba kin leit thied jingthied na Iewduh.
Ha Standjeep na ka liang jong ki Magistrate bad ki pulit kila hap ban ap ha surok banpynsngewthuh ia ki briew ba kim dei ban ia mih khlem da don kam tyngeh bad na ka liang jong ki magistrate bad ki pulit kila pynphai biang ia ki briew kiba mut ban iaid khlem da don kam.
Haba ioh ia ka jingeh kaba ki bor jong ka District Administration ki ia kynduh ha kaba khanglad ia ki paidbah ba kin nym kiew sha iew, na ka liang jong ki nongkit kam shnong Quallapaty, Wahthopbroo, Mawkhar bad Umsohsun kila ia mih ban pynsngewthuh lem ia ki paidbah.
Kumba ka paw na ka jingia mih ki briew mynta ka sngi ha kitei ki jaka ba la hap ban ap da ki pulit bad ki magistrate ka long la kumba khlem don kata ka jingkhangdam, ha kane ka nongbah Shillong.
