Mawkyrwat, Jylliee 3: Hadien ka jingiohi lyngba ki lad pathai khubor halor ka jingbymdon drivers ban niah iaka Ambulance ne 108 hapoh Mawkyrwat, South West Khasi Hills District na ka bynta ban kit iaka met jong uba khlad naka khlam COVID-19 na ka Shnong Nonglang , South West Khasi Hills District myn haka 31.05.2021 naka liang ka Seng ka pynpaw iaka jingsngewdiaw halor kane bad kum ka seng ka kwah ban pyntip ba ki dkhot jongka seng mynta ki la long kiba la kloi ban mih shakhmat ha kiba kum kine ki khep ba ym don drivers ban niah iaki kali Ambulance bad 108.
Haba iadei bad kato ka jingjia ka seng ka la ioh jingtip ba don napdeng ki drivers ka Ambulance ha Mawkyrwat Corona Care Centre kiba ioh positive, don napdeng jongki ba hap quarantine bad ruh napdeng jongki kiba dang leit duty sha ka Ranikor .
Ka Seng kan nym kwah ban kynthoh iaka jingtreikam jongki nongtrei ka koit ka khiah haka District namar ngi la iohi ba ka tnad ka koit ka khiah haka District ka dang duna palat haka liang jongki nongtrei ban ianujor bad kiwei kiwei ki District. Kine kiei kiei ki jia long namar ka jingleh bym patiaw jongka sorkar iaka South West Khasi Hills District bad kum ka seng ngi kwah ban ong ba ka sorkar ka hap ban shim jingkitkhlieh halor kane.
Haba kum kane ka por jongka saw ka sian , ka seng kam kwah ban kren bunktien hynrei kan ai ka jingshakri iaki paitbah ka dong ka thain bad ka Jaitbynriew da kaba ngin long kiba la kloi ban mih shakhmat ban phah iaki volunteers ka Seng ban leit niah iaka 108 ne Ambulance na bynta ban kit iaki nongpang COVID 19 ne wat lada ki don ki khep ba ka don ka jingiap ruh lada jia ba ym don drivers ban niah. Ngi kyrpad iaki paitbah bad iaki bor pyniaid jongka District ban pyntip shaka seng lada ki don kiba kum kine ki khim khait ba iakynduh.
Shuh shuh, ka seng kum shibynta ban iasnoh kti lang bad ban ai mynsiem iaki 4 tylli ki shnong kiba dei ki shnong ha South West Khasi Hills District ngi la noh synniang hala i bor barit jongka jinglah jongngi daki Personal Protective Equipments ( PPEs) shaki nongialam jongka shnong Mawten, Mawlangwir, Nonglang bad Jashiar.
Ha kane ka jingleit noh synniang la ialam da u samla Pauldeep Tongwah Secretary Employment and Development Cell jongka KSU South West Khasi Hills District uba dei ruh u President ka KSU Mawkyrwat Circle nangta u samla Lurshaphrang Shangdiar EC Member KSU South West Khasi Hills District, u samla Rutherford Lyngdoh General Secretary KSU Mawkyrwat Circle bad kiwei kiwei ki dkhot jongka seng. Kane ka dei ka kyrwoh na u samla Forwardman Nongrem, President KSU South West Khasi Hills District.
