Shillong, Nohprah 07: Namar ka jingpynslem jong u Lat ka jylla u la pynslem ban soi ia ka Meghalaya Residence Safety bad Security ordinance u bah HS Shylla CEM barim jong ka KHADC u la khot ia ki nongialam seng bhalang, ki MP, MLA, ki MDC ban ia kren halor katei ka phang ha ka 9/12/2019 ha iing dorbar shnong Mission Compund Shillong.
La pynbeit ban don ka jingiakynduh lang jong ki Nongialam baroh jong ki Seng Bhalang, Seng Sainpyrthei, ki Khlieh Nogsynshar Hima, ki Shnong, ki Nongmihkhmat baroh, ki MP,MLA,MDC, ki Riewkhmat, kino kino kiba sngewkhia halor ka jingpynslem u Governor ban soi ia ka Ordinance kaba dei ka Amendment halor ka Meghalaya Residents Safety and Security Act ba la dep pynpoi sha u Govenor.
La ia ka Meghalaya Transfer of Land Bill 1971 ka la long ha kane ka juh ka nongrim, kata, ba ka long pyrshah ia ka clause (e) jong ka Article 19 (1) bad la phah ia ka sha ka Sorkar Kmie hynrei la mynjur namar ka Meghalaya ka dei ka Jylla jong ngi ki Scheduled Tribe ba ngi lah ban thaw ain ban buh ia ka Jingpyrkhing Bashongnia (Reasonable Restrictions) katkum ka Article 19 (5).
Mynta ka pat ia ka tyngkhuh bad ka caluse (d) jong ka Article 19 (1) bad ka long kumjuh hi ban shah katkum ka Article 19 (5). Ka ILP ka hap ha kane ka Reasonable Restrictions ba sa lah pyntreikam ha Itanagar, Manipur, Mizoram, Nagaland. Ka Supreme Court badon burom ka ka niewkor bha ia kane ka Reasonable Restrictions, ka Sorkar India ka burom bha ia kane haduh ba ka pyllait ia ka CAB na ki Jylla ba la don ka ILP.
Kumno ia ka Meghalaya tang da kane syrngiew ka ILP ba une u Governor un leh kyllain kumne, ka long ka bym lah ban pdiang. Na ka liang jong u bah HS Shylla u sngewnguh katta katta ia ka Sorkar Jylla ba mynta ba ka la pynkhlain ia ka MRSSA bad kumjuh ruh ia kiba la thaw ia kane ka MRSSA, ngin iai pyrto ia ki.
Namar ka jingkyrkieh ka kam bad ka jingkyrpad kiba bun u Bah Shylla u la shim ia kane ka bynta ban khot ia kane ka jingialang ban iarai lang ha ka jingialang kaei kaba bha tam ban leh ban ioh ia ka jingsoi u Governor. Ka jaka ha Community Hall, Mission Compound, la sngi nyngkong 9/12/2019 Shillong ha ka por 2.00 pm la ong u bah HS Shylla Ex CEM.
