Shillong, Naitung 27: Na ka liang jong ka CoMSO ha kaba nyngkong eh ki pynpaw ia ka jingsngew bitar bad ka jngbymhun ha kaba iadei bad ka jingniewbein jong u Myntri ki kam pohing ka Sorkar India ia ka Jaidbynriew bad ka Jylla hi baroh kawei.
Ha ka jingiakynduh bad ki Nongialam jong ki Sengbhalang ha kane ka sngi Saitjain kaba lahdep ha kaba u khlem kren wat tang shikyntien ruh ia kaei kaba ka Sorkar India ka pyrkhat halor ka jingdawa kum ka Jylla ia ka ILP.
Ka kynhun CoMSO shim ia kane ka jingleh ka jong une u Myntri kum ka jingbym suidniew ia ka jingthrang bad jingkwah ka jong ngi kum ka Jylla bad ngi pynrem jur ia kane ka jingleh jong u.
Mynta ka sngi ka 27 tarik, na ka liang ka CoMSO ngi lah don ka jingiakynduh jong ki Nongialam na ki Seng kiba don hapoh ka kynhun bad da kawei ka jingmut ki lah rai ban nym sangeh bad ban nang iai ialeh haduh ba ka Sorkar India kan sngap bad ai ha ngi ia ka ILP bad ban pynurlong ia kane ka jingthrang jong ka Jaidbynriew bad ka Jylla hi baroh kawei.
Ka CoMSO kala shim ia ka rai ban pynlong ia kane ka jingiakhih ban dawa ILP kum ka jingiakhih ha ha ka Jylla hi baroh kawei bad ha ryngkat ka “Direct Action” lyngba ki kam ki ba kin sa pynpaw nangne shakhmat.
Kila rai ban ruh ba ngin pyrshang ban wanrah tang kawei ka jingiakhih dawa ILP ha ka Jylla ka ban kynthup lang ia baroh ki Sengbhalang bad ki Khlieh Nongsynshar naduh ki Syiem, Ki Dolloi, ki Sirdar bad kumta ter ter ha ryngkat u paidbah ka Jylla baroh kawei lait noh ia ki Seng Sain Pyrthei.
Khnang ban pynkhlain bad ban iaid beit iaid ryntih ki kam jong ka Kynhun, ka Jingialang ka lah rai ruh ban jied thymmai ia ki Nongkitkam jong ka Working Committee jong ka CoMSo kane ka long katkum ka kyrwoh kaba la phah ba u bah Robertjune Kharjahrin shongknor ka CoMSO.
