Shillong, Naiwieng 19: Mynta ka sngi ka kynhun ki seng bhalang kaba kyntup ia ka KSU, FKJGP, HNYF, RBYF, ADE, AYWO bad GSU mynta ka sngi kila la pynlong ia ka jingiakhih shong kyllain mungor ha Madan Malki Shillong ban dawa na ka sorkar pdeng ba dei ban pyntrei kam ia ka ILP ha kane ka jylla kumba la pdiang ia ka raid a ka iing dorbar ka jylla Meghalaya.
U president jong ka KSU u samla Lambokstarwell Marngar haba kren ha ki lat pathai khubor u la ong ba kum ki paidbah ka jylla kila dawa ia ka ILP na duh u snem 1979 bad ha u snem 2019 bnai Nohprah ka sorkar kala shim ia ka rai hapoh ka iing dorbar ban pyntrei kam ia ka ILP ha kane ka jylla.
Ia kane ka rai jong ka sorkar jylla la phah sha ka sorkar pdeng hynrei mynta la jan dap shisnem ka sorkar pdeng kam shym la leh ei ei halor kane, u nongialam ka seng KSU u la kynnoh ba kane ka dei ka jingniew bein jong ka sorkar pdeng ia ka rai jong ka iing dorbar ka jylla kaba la shim ia ka rai.
U bah general secretary jong ka seng HNYF u bah Sadon Blah u la ong ba ha ka synshar paidbah ia ka sur jong u paidbah la pynpaw ha iing dorbar da ki 60 ngut ki MLA ban shim ia ka rai ban pyntrei kam ia ka ILP ha kane ka jylla, lada ka sorkar pdeng kam sngap ia ka sur u paidbah kala bha ba kine ki 60 ngut ki la dei ban hiar shuki noh bad ban don ka jinglehrain. U bah Willberth Rani ruh ia la ai ia ka jingkren jong u.
Ha kane jingiakhih shong kyllain mungor, kiwei ki mat jingdawa kiba kitei ki seng bhalang kila dawa ka long ba ka sorkar pdeng ka dei ban pynrung noh ia ka ktien khasi sha ka khyrdnit kaba phra jong ka Riti Synshar jong ka Ri, ka jingpyrshah ia ka CAA, ka jingdawa ban pynbeit noh ia u pud u sam bad ban pyntrei kam noh ia ki jaka rung jaka mih kiba la dep ban don ha ka ain MRSSA.Ha kane ka sngi kum kane ka jingiakhih la pynlogn ruh da ka KSU ha Khliehrait ha East Jaitnia Hills District .
