Shillong, Nohprah 6: Da ka Rai kaba biang kawang ka Meghalaya High Court ia ka sorkar MDA. Babu Kular Khongjirem. Ka Meghalaya High Court ba donburom ka la ai syndon da ka rai kaba biang ha ka por ba ih bha ban pynduh pyndam noh pyrshah ia ka rai leh donbor bad bym shongnia ne shong nongrim jong kane ka sorkar MDA halor ka jingiashim bynta ki nonghikai bym dei sorkar .
Kane ka rai jong ka Kashari ba heh duh jong ka state Meghalaya ym tang ba ka pynkhie im bad ai mynsiem biang ia ki nonghikai bym dei sorkar hynrei kadei ruh ka rai kaba la pynim biang ia ka hok bad ka jingang nud ban shakri ne trei jong ki nonghikai ban ai lem ki jinghikai, ki jingpynsngewthuh paidbah ha ka kam sain hima-sima baroh.
Shwa ban mih kane ka sorkar MDA ba la lamkhmat da ka party NPP, baroh ki nonghikai bym dei sorkar ki lah ban shim bynta laitluid ha ki kam politics katba ki mon ha ki party bapher bapher.
Naduh ka por ba long Chief Minister u (L)Capt.W.A Sangma,(L)D.D Pugh,(L)B B Lyngdoh,(L)P.A Sangma, Shri S C Marak,(L)Dr.F.AKhonglam,Dr.DD Lapang,(L) JD Rymbai,(L)Dr.Donkupar Roy,Dr.Mukul Sangma,etc. kim ju pynwit pynthut satia ia ki nonghikai ba kin don bynta ha ki kam politics.
Mar ia shimti kane ka sorkar MDA ha u snem 2018 hapoh ka jingialam u Conrad K Sangma jong ka NPP, la sdang ban bishni bad pihuin da kaba teh ba khum da ki kyndon ba eh pyrshah ia ki nonghikai bym dei sorkar.
Ym tang ba ki shun thlong mluh thlong sying ia ki nonghikai hynrei ki da leh sat ruh ia ki da kaba pyndik bad pynslem kai ia ka tulop jongki haduh ban pynthiah miet syndon ha surok Secretariat bad wat ban siat tiar gas ruh ia ki nonghikai kiba pli.
Ym tang katta, u Chief Minister bad Deputy Chief Minister lei lei jong kane ka sorkar MDA ki la kren kop sarong lypa ia ki nonghikai ba kim lah shuh ban pyllait ba kin shim bynta ha ka kam politics bad lada ki kwah,ki ai jingmut(advised) pyllein pyllein ban leit sha ka ing Kashari(Court).
Dei tang kane ka sorkar kaba shan khmat eh ia ki nonghikai ha ki kyrdan bapher bapher. Kane ka rai jong ka Meghalaya High Court ba donburom ban pynduh pyndam noh pyrshah ia ki jingkwah rhah jong kine ki nongialam ka sorkar MDA ia ki nonghikai bad ban ailad biang ia ki ba kin ia don bynta laitluid biang ha ki kam politics.
Kane kan long kumba mynshwa katkum ka jingsngewtynnad jong kila dei ban ai ka jingiaroh bad jingsngewnguh sngewburom shi katdei eh.Kito ki kynhun jong ki Nonghikai College kiba la rai kut khlem kyntiang dien ban iakhun pyrshah ia kum katei ka rai donbor bad ban bein(arbitrary decisions) ruh dei ban ai ka jingiaroh bad ka jingpyrto junom la junom.
Hynrei,dang don bun bah ki jingdonkam ba dei hok(genuined grievances) ba ki nonghikai bym dei sorkar ki dei ban ioh.Lada ka sorkar kam shah shkor ne leh bym suidniew, imat, donkam shisha ia ka Kashari ba kan tuklar lem sa ia kiwei kiwei ki Hok ba ki nonghikai ki dei ban ioh kum ka bai nong jong ka jingshakri hok jongki ban ai jingstad ia ki samla pule haduh ba kin da nang da stad ha ki kyrdan bapher bapher.
