Shillong, Naitung 28: Ka seng samla pule ka Garo Student’s Union (GSU) ha dien ka jigniakynduh ia u myntri kam poh iing ka Ri india u Amit Shah ha Shillong namar ka jingbym kren ei ei halor kane ka jingdawa ILP ka GSU kala thoh da ki jingthoh ha ki kynroh ha kylleng ba ki dawa ia ka ILP.
Kine ki jingthoh ba la thoh da ka GSU ka long ha kylleng ki bynta jong ka Garo Hills, khamtam ha Tura kine ki jingthoh ka long ban pyni sha ka sorkar ba ki paidbah ka jylla Meghalaya kala dawa ia ka ILP.
Kum kine ki jingthoh la thoh ruh ha kylleng jong ka Ri Khasi ia kaba la thoh da ka seng KSU bad ki jingthoh ka long ba ki dawa ia ka ILP ba dei ban pyntrei kam ha kane ka jylla Meghalaya ia kaba la pdiang da ka iing dorbar thawain ka jylla ia ka rai.
Kane ka jingdawa ILP kam dei shuh kaba dang thymmai ha kane ka jylla Meghalaya, hynrei kaei kaba ka sorkar kala shim ia ka rai ka long ha ka 19th Nohprah 2019 bad ia kane ka rai la phah sha ka sorkar pdeng ia kaba ka sorkar pdeng kam pat ai jubab.
Na ka liang jong u myntri rangbah ka jylla halor kane u la ong ba ha ka jingiakynduh bad ka kynhun myntri na ka liang jong u myntri kam poh iing ka Ri India u la ong ba ka sorkar pdeng ka dang bishar bniah ia kane ka jingdawa ILP.
