Shillong, Naiwieng 17: Ka sngi ba khatduh jong ka Cherry Blossom Festival kaba long ha kane ka sngi Saitjaiñ ka la long kaba shongshit bha da ki prokram bapher bapher. Ha kane ka sngi, da ki hajar ngut ki paidbah ki la tuid sha kylleng ki jaka pynbyrngia jong ka Cherry Blossom Festival.
Ha kane ka s
ngi ki nongjngoh kai pyrthei kiba wan na poh ka Ri kumjuh ruh na barri ki la wan ban sakhi lang ia ki tamasa bapher bapher.Ha katei ka sngi khatduh ki la don ruh ki rynsan phylliew jingmut ban wanrah shuh shuh ia ka jingiadei hapdeng ka India (Meghalaya) bad South Korea ia kaba la tip kum ka Bilateral Summit.
Lah ban kdew hangne ba ka South Korea ka dei ka ri kaba snohkti lang ha kane ka Cherry Blossom Festivalkaba long mynta u snem.Kum shi bynta ban pynkhlaiñ shuh shuh ia ka jingiadei hapdeng kitei ki ar tylli ki Ri, ka la don ruh ka jingpyni ia ka phlim Korea kumjuh ruh ka jingrwai na u nongrwai K-Pop na katei ka Ri, u Jang Hanbyul.
Kaba kham khring ia ki paidbah kiba wan na shabar, kadei ka jaka die ia ki jingbam tynrai ha madan Polo Fifth Ground ha kaba jan baroh kiba wan ki leit ban mad ia kitei ki jingbam ki kim ju kham ioh koit ha ki dukan mynta.Kawei pat ka jaka kaba khring kadei ha Wards Lake, ha kaba ki nongwan kai khamtam ki samla ki tuid bun bha ban shim bynta.
Ha kane ka sngi, na ka liang u nongkit ‘tien syiem jong ka South Korea sha India, u Shin Bong-Kil uba kren kum u Kongsan ban pynhap pyrda ia katei ka Cherry Blossom Festivalha Polo u la pynpaw ia ka jinglyngoh ban iohi ba ka jingrwai K-pop lane Korean pop ka pawnam bha ha kane ka jylla.
“Nga kyrmen ha kawei ka sngi, ki kynhun kum ka BTS kin wan ban pynshongshit ha kane ka nongbah,” la ong u Bong-Kil. Utei u nongkit ‘tien syiem jong ka South Korea u la ong ruh ba u khmih lynti ba ka jingiatrei lang hapdeng kaba kham jan la ka long ha ka kolshor lane ha ka ioh ka kot hapdeng ka South Korea bad ka Meghalaya.
Ha kajuh ka por u pynpaw ruh ia ka jingkmen ba u Myntri Rangbah ka Jylla, Conrad Sangma un leit sha South Korea ban pynkhlaiñ shuh shuh ia ka jingiadei hadpeng ka Meghalaa bad South Korea. U ong ruh ba ha shwa ba un leit phai noh ha kane ka sngi U Blei un sa leit ruh ban kynduh ia u Lat ka Jylla, u Tathagata Roy.
U Bong-Kil ula pynpaw ba kine ki ar tylli ki ri kin sdang ruh ia ka jingiatrei lang ha ka liang ka kam jngohkai pyrthei, nangta ka jingpynbha biang ia ki par dewiong kiba la shu ieh shrah, bad ka jingkhie im pat ia ki tyllong um nalor kiwei kiwei ki bynta.
Hadien kane u la sam ruh ia ki khusnam sha ki nongjop ha ki jingiakob bapher bapher kiba la pynlong ha katei ka tamasa. La donlang ruh ha kane ka sngi u Myntri ka tnad Forest ka sorkar jylla, u Bah Lahkmen Rymbui kum u Symbud Kongsan. Ha ka por janmiet jong ka sngi kut, ka la don ruh ka jingia tem lang ia ki jingrwai tynrai jong ki Khasi bad ki Korea.
