Shillong, Nailar 03: Ki nonghikai shipor kiba la shah pynduh kam ki dang bteng ia ka jingiakhih shongkyllain mungor kaba khlem buh por ha ophis jong ka MBOSE bad haduh mynta kam pat don kano kano ka jingiakren bad ka sorkar halor kane ka jingdawa ka jong ki.
Kine ki nonghikai kiba la shah weng kam shipor hapoh jong ka seng “Meghalaya Government LP School Contractual Teachers Association” kiba don palat 850 ngut kila iai bteng ia ka jingiakhih jong ki ha ophis jong ka MBOSE la lai sngi mynta ka sngi ha kaba ki nonghikai ki don ha katei ka jaka.
Lah ban pynkynmaw ba u nongialam ka seng u bah Birbor Riangten, nongialam ka seng, la ong ba ka jingbakla kam dei na ka jingleh ka jong ki hyrei dei na ka jingleh jong ka sorkar, wat la kila hikai palat shiphew snem tang namar ba kim pass ia ka Meghalaya Teachers Eligibility Test (MTET) kila shah pynduh kam noh.
Ki nonghikai kiba don ha katei ka jaka ki kwah ban ia kynduh biang ia u myntri rangbah ka jylla ban ia kren biang ia kane ka jingshah weng kam ka jong ki bad mynta ki dang ap ia ka jngwan phai jong u myntri rangbah ka jylla sha nongbah Shillong.
Haba ia kren bad ki nonghikai kiba dang bteng ia kane ka jingiakhih ha MBOSE ophis kila pynpaw ba haduh mynta kam pat don kano kano ka khubor ka ban wan na ka liang jong ka sorkar jylla ha kaba ia dei bad kane ka jingiakhih jong ki bad ki dang ap ban wan phai u myntri rangbah ka jylla ba kin ioh ban ia kren.
