Shillong, Risaw 10: Ki briew jong ka State Disaster Response Fund (SDRF) haduh mynta ka sngi ki dang wad ia ki saw ngut ki briew kiba jah na ka daw jong ka jingbthei u pipe um ha Kopili Hydro Electrical Power Plant kaba don ha khappud jong ka Assam bad Meghalaya.
Une u pipe um ba bthei u dei u ba pynpoi ia ka um sha u turbine ban pynmih bor ding iletrik bad kane ka jingjia kala jia ha ka por mynstep jong ka sngi nyngkong kumba 4.30 baje ei ei bad ha kane ka jingjia saw ngut ki briew kila jah ryngai.
Ka nongai ktien jong ka North Eastern Electrical Power Corporation (NEEPCO) ka kong L Kharmawphlang haba kren ha u SP News Agency mynta ka sngi kala iathuh ban a ka liang jong ka SDRF bad ki briew jong ka NEEPCO ki dang wad ia kine ki briew ba jah haduh mynta ka sngi ha katei ka jaka.
Ka kong Kharmawphlang kala iathuh ba na kine ki saw ngut kiba jah, lai ngut ki dei ki nongtrei jong ka NEEPCO bad u wei pat u dei u nongtrei jong u wei u kontraktor. La ong ba ka dei ka jingtip kaba la ioh haduh mynta ka sngi ha kaba ia dei bad ki briew kiba jah na katei ka jaka.
Haba ia dei bad kane ka jingjia na ka liang jong ka NEEPCO kala khot ruh ia ka jingiarap na ki stad jong ka NHPC bad jong ka Bhakra ban iarap. La ong ba mynta la pynhiar ia ka um ha katei ka jaka pynmih bor ding ban iada na ka jingma.
Ha ba ia dei bad ka dam um ha kopili la ong ba kamd on kano kano ka jingma ia ka dam. Ha kane ka jingbthei jong u pipe um u “isolating Valve” u ban pynsangeh ia ka um u la duhnoh. Kumba ka long mynta la lah ban iada na ka jingma. Haba ia dei bad kane ka jingjia ka jingtohkit kala iaid.
