Shillong, Naitung 18: U Prof David Reid Syiemlieh u nonglap ia ka sngi iap ba shisha jong u Syiem Tirot Sing jong ka Hima Nongkhlaw mynta ka sngi u la kren ha ki samla pule jong ka Lady Keane College kiba shim ia ka sobjek History ha kaba u la ong “Dang don kam ban wad bniah shuh shuh halor u Syiem Tirot Singh ia ka jingleh bad ki phareng”.
U la kyntu ia ki samla pule ba lada ki kwah ban lap shuh shuh ia ki jingthoh ha kaba ia dei bad ka jingleh u Syiem Tirot Sing bad ki phareng 1829 haduh 1834 dei ban leit sha ka Nottingham Univeristy ha London hangne ki don bun ki jingthoh kiba la buh kyrpang ha kaba ia dei bad ki jingjia ha kine ki lum.
Ia kane ka thma bala ia leh hapdeng u Tirot Sing bad ki phareng ka dei ka “ Thma Anglo Khasi War” kam dei ka “Khasi War” la pynshai u Prof Syiemlieh. La ong ba la don bun ki jingthoh khlem da don nongrim ha kaba ia dei bad u Syiem Tirot Sing, la ong u Prof Syiemlieh.
La ong ba ia kaei kaba la thoh sha phang jong u Syiem Tirot Sing ki dei tang shiliang bad kata tang na ki jingthoh ba la thoh da ki phareng kita ki jingthoh ki long naduh u snem 1829 haduh 1835 kiba khlem ai ia kaei kaba jia shisha.
Dei ha dien jong u snem 1950 ki jingthoh kibala mih kila khma ia jan ha ka jingiadei bad u syiem Tirot Singh bad kata ka dei ka jingjia ha Nongkhlaw ha ka 4th Iaiong 1829 ia kaba la tip kum ka “Nongkhlaw Massacred”.
Dei ha ka jingthoh jong u Dr Homiwell ba la kdew ba u iap ha 4th Iaiong 1834 bad ia kane ka sngi la rakhe ia ka sngi iap jong u Tirot Sing, hynrei ha ka jinglap jong u na ka jingthoh ha ka por ba u don ha London na ka jingthoh u Sila na Decca kaba la u la phah sha u Secretary “ Tirot Sing u la khlad mynnin ka sngi ha ka por 1.00 Baje Nohphai sngi” ia kane ka shithi la thoh ha ka 18th Naitung 1835, na kane ka jingthoh ka pynpaw shai ba u khlad ha ka 17th Naitung 1935. Ha kane ka shithi kam shym thoh ei ei kumno u iap.
“Dei halor kine kiei kiei dang don kam ban dang hap wad bniah shuh shuh ha kaba ia dei bad u Syiem Tirot Singh, ka jingshisha ka long ba u khlem iap kum kiwei ki koidi, hynrei u iap kum u State Prisoner, ka History ha kaba ia dei bad u Tirot sing ka dei ban khlem pat dep, namar ki jingthoh na ki phareng ki long tang shiliang” long ong u Prof Syiemlieh.
