Shillong, Nailar 30: Ka kynhun ki seng bhalang hapoh jong ka lama Confederation of Meghalaya Social Organization (CoMSO) kaba la ialam da u bah Robert J Kharjahrin ka la leit ban ia kynduh ia u Bah Kyrmen Shylla myntri ba dei peit ia ka tnad khyndew ban pynbeit noh ia ka Land Transfer Act.
Haba kren ha ki lad pathai khubor ha dien ka jingiakynduh ia u myntri ka sorkar jylla u bah Robert J Kharjahrin u la ong ba un dang bishar ia kane ka kam, la iathuh ruh ba na ka liang jong ka KHADC ruh kila ia kynduh ha kaba ia dei bad kane ka juh ka phang.
U bah Robert u la ong ba kane ka jingwan ia kynduh ia u myntri kam dei shuh ka jingdawa kaba thymmai hynrei ka jingwan ka long ban pynkynmaw ia ka sorkar ba ia kane ka juh ka jingdawa la dep ban ai ia ka dorkhas sha u myntri rangbah ba rim ka jylla u Dr Mukul Sangma bad ha kane ka sorkar kaba mynta kaba la ialam da u Conrad K Sangma.
Ka jingkwah jong ka CoMSO ka long ba ka sorkar ka dei ban batai thymmai noh ia ka ktien riewlum hapoh jong ka Land Transfer Act , namar kane ka ain haba ong Riewlum ka kyntup ia baroh ki riewlum jong ka Ri India, kaei kaba ki kwah ka long ba ka sorkar ka dei ban wanrah ia ka jingkylla da kaba niew riewlum tang ia ki trai shnong jong ka jylla Meghalaya.
Ha ka juh ka por ki District Council ki dei ki nongpeit ia ka khyndew ka shyiap, hynrei haba ia dei bad ka jingshim jaka pat ki District Council kim don bynta ei ei ruh em kiba ai ia ka NOC dei tang ki Nokmas, ki Syiem bad ki rangbah shnong, ka CoMSO ka kwah ba ka ktien District Council ka dei ban rung hapoh jong ka tei ka ain, kumba ka long mynta u ba donbor ban ai jaka dei u DC bad ki SDO.
Katkum ka Land Transfer Act baroh ki riewlum ki lah ban thied jaka ha Meghalaya, ka CoMSO ka dawa ba ia kane ka rukom dei ban khanglad noh ban shah ia ki riewlum, bym dei na Meghalaya ha ka ia dei ia thied jaka. Ban pynshem ia kane ki la don ki ain naduh ka snem 1908, ha ka por jong ki pahreng, kum juh ha ka sorkar Assam ba ha ki lum kahsi bad Garo kiwei ki jaidbynriew kim lah ban thied jaka.
Ha ka Land Acquisition Act 2013 jong ka sorkar haba shim jaka dei ban khot ia ka jingpyntip paidbah. Ka seng ka kyntu ia ka sorkar ba ka dei ban shim khia ia kane na ka bynta ban iada ia ki jaka puta na ka jingshah thied ha kiwei ki jaidbynriew.
