Shillong, Naitung 20: U Zenith Sangma secretary jong ka All India Congress Committee (AICCC) u la ong ba ka seng congress ka dawa na ka sorkar ba ka dei ban pyntip ia ka kyrteng jong kito kiba shitom COVID-19 khnang ban dup lah ban ia khun pyrshah ia kane ka jingpang.
Haba kren ha ki lat pathai khubor mynta ka sngi ha Congress Bhavan Shillong, u tei u nongialam jong ka seng Congress u la ong ba kum ka party Congress ka don ka jingsngewkhia bad ka jingbym hun ha kaba ia dei bad ka jingleh jong ka sorkar ha kane ka jingiakhun pyrshah ia kane ka khlam COVID-19.
Ka sorkar kam shym la shimkhia ia ka naduh kaba sdang, kane ka paw shai ha kaba ka sorkar kala shu leh tang ia ka Thermal Screening ia kiba wan phai bad phah noh ia ki sha iing bad ha dien kata ki sa leh ia ka RT-PCR test bad ka don ka jingtieng ioh kane kala saphriang ruh sha ki paidbah.
Ka jingleh jong ka sorkar ban shah ia ki katto katne ki briew ban leit iathoh sha bar ruh ka long kaba ym lah ban pdiang, dei na kane ka daw ba ka seng Congress ka dawa ba ka sorkar ka dei ban pyntip ia ki kyrteng jong kito kiba shitom COVID-19 khnang ban lah ban iada na ka jingsaphriang une u khniang jingpang.
La ong ba kane ka jingialeh pyrshah ia kane ka khlam ka dei ka sorkar marwei, hynrei hap ban ia leh bad ia treilang da baroh, hynrei lada ym tip kumno yn iada namar ki briew kim tip, la ong u Zenith Secretary ka AICC.
U la ai nuksa ia kaei kaba la jia ha South West Garo Hills District, u ba shitm dei na Salmapara, ka sorkar kala test ia u bad phah sha iing bad ha dien bala ioh ia ka reslot la shem ba u long positive, hato kane kan nym don kata ka jingiabit sha ki paidbah ia kaba u Myntri Rangbah ka jylla bad u Symbut Myntri Rangbah ka jylla ki dang len.
Haba ia dei bad ka jingbthah jong ka sorkar ban ong ba ki briew ki hap ban deng mask ha ki jaka paidbah, hynrei dang bun ki bym deng ia ka mask ka sorkar ka dei ban pynshitom ia ki bad da hap ban shim ia ki lat li lynti kaba kham tyngeh ruh hap ban leh namar ba haduh mynta ym pat don dawai.
Ki nongialam ka seng Congress kiba la ia don lang ha kane ka por ki long u Bah James Lyngdoh Working President ka MPCC, u Bah George B Lyngdoh, bah Kimfa Marbaniang bad u bah Mohendro Rapsang baroh ki MLA.
