Shillong, Iaiong 24: U Nongialam ka liang pyrshah u Dr Mukul Sangma u la phah da ka shithi sha u myntri rangbah ka jylla u Cornad K Sangma ban dawa ba ka sorkar ka dei ban pynhair mardor ia ka jingpynkiew dor ia ka Petrol bad ka Diesel.
Ha ka shithi kaba la thoh sha ka sorkar u la ong ba kane ka jingpynkiewdor kan ktah ia ki paidbah khamtam ha kane ka por ba dang don ia kane ka jingialeh pyrshah ia u COVID-19. Ha kane ka jingialeh pyrshah donkam ia ka jingiatreilang jong baroh ban poi sha ka thong.
U Dr Mukul nongialam ka liang pyrshah ha ka shithi u la kdew ba kane ka khlam COVID-19 kala ktah ia ka ioh ka kot jongka pyrthei baroh kawei bad ki ri jong ka pyrthei kila shim ia ki lat ki lynti baroh ban ialeh pyrshah ia kane katba kilah. Kum juhka Ri India ruh kaba la shah ktah kala shim ia ki lat ki lynti ban iada ia u paidbah jong ka Ri.
Kumba ka long mynta ia ka jingduh un nym lahshuh ban khien, la ka long ha ka kam, ka jinglynga pisa ha ka jingduh ia ka kamai kajih, ka sorkar ka dei ban peit ia kane bad ban pyntrei kam ia ki lat ki lynti kumno ban kyntiew ia ka koit ka khiah bad ia ka trei ka ktah ban pynlait ia ki briew ia kane ka jingjynjar kaba kila duh ha ka kamai kajih.
Ka long kaei kaei kaba ym lah ban sngewthuh ba ha kum kane ka por ka sorkar Meghalaya kala shim pynban ban pynkiew ia ka khajana ia ka Petrol bad ia ka Diesel lyngba ka Value Added Tax ban pyndap ia ka pla tyngka jong ka sorkar.
Kaba sngew kyndit haba ka dor jong ka umphniang kala hiar dor ha ka pyrthei hynrei la shu pynkiew, kane ka jingpynkiew iaka Petrol bad Diesel ka ktah ia ki paidbah. Dei ban tip ba ka jingsaphriang ka khlam COVID-19 ka dei ka jingjulor kaba la dep ban pynbna da ka sorkar pdeng hapoh jong ka Disaster Management Act, 2005 jong ka kyndon (j) bad (k) jong ka kyndon (2) jong ka kyndon kaba 38 ka DMA 2005.
Kane ka jingpynkiew dor ia ka Petrol bad Diesel kan ktah ia ki paidbah ha kane ka por ba ka Ri bad ka jylla ka don ha ka jingeh. U Dr Mukul u dawa ba ka sorkar ka dei ban weng noh ia kane ka jingpynkiew dor ia ka Petrol bad Diesel.
