Shillong, Jymmang 17: Ka HYC Dangar Balat Border circle ka pynpaw ka jingsngewlem halor ka jingjia kaba la jia kyndit ha ka 15tarik Jymmang 2021 ha Iew Balat, ha kaba ka la don ka jingkem ding ba kynsan, ia ka karkhana jong I Bah L. Lartang.
Kane ka jingjia, lehse dei ba wanjia ha kapor mynsngi mynshai, la lah ban lait na ka jingjia basngewsih ne ka jingiap.
Ha kaba iadei bad katei ka jingjia bad ka jingduh nong jong u trai ka karkhana bad ka iing ba marjan ba la kem ding, na ka seng ngi kyrpad ia ka ophis jong u BDO Ranikor C &RD Block ki Nongmihkhmat jong ka thain (MDC/MLA) ba phin kner lem ki lad jingiarap.
Kumba ngi iohi shaphang katei ka jingjia, ka jingslem ban tem ia ka ding bad ka jingioh pur sha kato ka iing ba marjan, kadei ka daw ba kam don ka tnad Fire Service ha katei ka jaka.
Kumta na ka seng ngi dawa ia ka tnad Fire Service jong ka Jylla ba kadei ban buh noh kawei ka Branch hapoh ka shnong Balat ne Dangar khnang ba kan ai jingshakri kaba biang hapoh kane ka thain.
Kane ka long katkum ka kyrwoh ba la phah da u Assistant General secretary ka HYC Dangar Balat Border circle Bah M. Nongsiej.
