Shillong, Naitung 24: Ka Seng HYC CEC hapoh ka jingialam u General Secretary Bah Roy Kupar Synrem bad ha ka jingdon ryngkat ki Vice – Presidents, Bah Donbok Kharlyngdoh bad Bah Rhembor Saibon, Bah Danny Mukhim, Asst Organising Secretary bad Bah Edmund Khongngai, Member CEC , mynta ka sngi ka 24tarik ka la leit ban iakynduh ia u Commissioner Transport Department Bah I.W. Ingty, IAS.
Kane ka jingleit ia kynduh ka long ban ujor pyrshah ia ka jingkhot aplikeshon da kane ka ophis ha kaba iadei bad ki Post Enforcement Inspector bad Enforcement Checkers ha ka Transport Department lyngba ka Advertisement Dated 16.07.19 ha kaba lah khot ban pyndap ia 6 tylli ki Posts Inspector bad 15 tylli ki posts Checkers ha ka Transport Department.
Na ka liang ka Seng ha ka Dorkhast ba lah ai ha u Commissioner bad ha ka jingiakren ka pynpaw ia ka jingpyrshah kaba jur halor kane ka jingkhot aplikeshon dalade hi da kane ka Department ym kumba ju leh ha ki snem ba lahdep ba ia ki kam ba lait baroh la ju khot lyngba ka MPSC hynrei mynta pat lah khot hi dalade. Ka Seng ka pynpaw ia ka jingbymhun halor kane ba ioh kane ka rukom thepkam kan nym long kaba khuid ba suba bad kan pynduhnong ia ki samla kiba dei hok shisha ban ioh ia kine ki kam.
Ka seng ka pynpaw ruh ia ka jingpyrshah halor ka jingbym thoh shai ha kane ka Advertisement la ka Polisi Bhah kam ( Reservation polisi) jong ka jylla la kan treikam ne em ha kane ka jingthepkam bad ioh kane ka wanrah pynban ka jingduhnong ia ki samla jong ka Jylla ban iohlad ban rungkam ha kane ka Department.
Na ka liang ka Seng ka dawa ba dei ban pynsangeh noh shi syndon ia kane ka jingthepkam bad dei ban khot biang lyngba ka MPSC bad ruh dei ban thoh shai ha kaba iadei bad ka jingpyntreikam ia ka Polisi Bhah kam jong ka Jylla.
Ha ka jingiakren bad ki Nongialam ka Seng na ka liang une u Commissioner u lah pynpaw ba ia kane ka kam u lah leh lyngba ka jingbthah jong ka Sorkar Jylla bad un sa ai jubab kham kloi katba lah bad kaba ba kham bniah ia ka jingthoh jong ka Seng hadien ba u la ioh ia ka jingbthah jong ki bor ba halor jong u.
Na ka liang ka Seng ngi lah pynpaw ba katba ym pat ioh ia ka jingpynshai bad jubab halor ki jingdawa jong ka Seng, ka Department kam dei ban iaid shakhmat ban khot ia ka Written Test ne Interview ia ki nongaplai halor kine ki kam. Ka Seng kan buddien bad pynlong ruh ki jingiakhih lada ka Department kam pynsangeh bad ai ka jingpynshai halor kine ki ki jingdawa jong ka.
