Shillong, Rymphang 10: U president ka Khasi Author Society (KAS),Dr D R L Nonglait u la pynpaw ia ka jingsngew kutlat ha kaba ïadei bad ka jingdawa ban pynrung ïa ka ktien khasi ha poh ka khyrnit kaba phra, namar ka jingbym ai jubab ka sorkar pdeng tad ha duh kine ki sngi ba mynta.
Ha ka jingïakren bad u nonglum khubor na ka liang u Dr Nonglait u la pynpaw ba ha ka jingia kynduh bad u Rajnath Singh u ba dei u Myntri ka tnad kampohïing ba mynshwa u la kular ban leh ei ei halor kane ka mat jingdawa ka KAS.
Hynrei kane baroh kala pjah noh na duh ba wan da u wei pat u myntri ba peit ia ka tnad kampohïing ka Ri kata u Amit Shah, ha kaba kim shym la ïoh jubab tad ha duh mynta, hynrei ki la ïoh tang ki shithi ba ki la ïoh pdiang ia ki mat jingdawa.
“Ka sorkar Jylla kadei ban pynlong official language noh ïa ka ktien khasi ha poh ka Jylla kum ba long ka English, lada ngi ïoh noh ïa kane kata kan ïarap shibun ha kaban pynkhlain ïa ka jingdawa jong ka KAS ban pynrung ïa ka ktien khasi ha poh ka khyrnit kaba phra” u la ong.
U la pynpaw ba kumba long ha duh mynta ka ktien Khasi ka danglong tang kum ka ‘associate official language’ ha ki jaka trei kam jong ka jylla bad na ka liang ka KAS kam pat da sngew hun haduh mynta. Ka KAS ka lap ruh ba ki don ki ‘officer’ ki bym da salia ïa ki ba kren khasi bad thoh khasi.”ka KAS ha kine ki sngi ki ban sa wan kan sa leit ban ia kynduh ia u Myntri Rangbah ka Jylla ban pynkynmaw ha lor kane ka bynta” u la pyntip.
U Dr Nonglait u la pynshai ruh ba na ka liang ka KAS kim pyrshah ia ka jingdawa ban pynrung lang ia ka ktien Garoh ha ka khyrnit kaba phra hynrei na kaliang ka KAS ka kyrpad ba kam dei ban don kano kano ka jingpyn suki ha ka ban pynrung noh ia ka ktien khasi wat ki don kiwei ruh ki ba daw ia ka juh ka mat kum ba ka KAS ka dawa.
“Ka KAS kan leh ia la ka jong ka kam ha ka ba iadei ban kyntiew ka ktien khasi bad pynroi ia ka bad kane ka ïaid beit sha khmat” u la ong.
