Shillong, Naitung 25: Na bynta ka bha ka miat bad ka jingmyntoi jong ki paitbah nongshong shnong jong ki 164 tylli ki shnong, ka Khasi Students’ Union South West Khasi Hills District ka ai iaka jingkyrshan ba pura iaka jingdawa jong ki Sengbhalang bapher bapher ka thain Mawsynram bad u MLA ka Mawsynram Constituency ban kyntiew kyrdan noh iaka Mawsynram Block sha ka Civil Division.
U president ka SWKH District jong ka KSU u samla Fowrardman Nongrem la ong ba kane ka jingdawa ka dei ka jingangnud ba la slem jongki paitbah hynrei kaba sngewsih ka long ba haduh mynta kam shym la urlong watla kane ka jingdawa jongki paitbah ka la neh jan 20 snem.
Ka KSU ka kwah ruh ban pynsngew shaka sorkar, ba iaka Mawsynram Block la thung naduh ka snem 1962 bad ka la don mynta jan 59 snem kum ka Community and Rural Development Block.
Ka Jinglong jongka jaka ( topography) bad ki jingeh jongki paitbah ha kane ka thain ngi sngew ba ka la dei ban kyntiew noh iaka sha Civil Sub Division. Ka Mawsynram Community and Rural Development Block ka don jan 164 tylli ki shnong bad kumba 54,109 ngut ki nongshongshnong katba kum ka Census 2011.
Ka jingjngai haka lynti iaid khamtam na thain khappud bad ka Bangladesh sha Shillong bad ka jingsniew ki lynti syngkien hapoh ka thain ki dei ki daw ba buh jingeh haka roi ka par jongka thain . “Kumta la I donkam ban pynjan iaka Administration shaki paitbah “.
Ka Mawsynram Community and Rural Development Block ka kynthup iaka jingheh kaba 510km kaba long ka daw ba kongsan kaba pyni iaka jingshongnia ban kyntiew noh ia kane ka Block sha ka Civil Sub Division.Ka jingjngai na Shillong sha Mawsynram ka long 56km bad ka lah ban kot shaduh 80 kms tam lada khein shaduh ki shnong khappud bad ka Bangladesh.
Ka jingai Civil Sub Division iaka thain ka dei tang kane ka lad ban wanrah iaka jingiajan jong ka synshar Khadar bad ki paitbah bad kumba ka sorkar Meghalaya Democratic Alliance hapoh ka jingialam u Conrad A Sangma ka ju ong ba ” ka dei ka sorkar jong ki paitbah” .
Na ka liang jogn ka seng KSU ki phah iaka kyrwoh khubor shaka sorkar ba ka dei ban sngap ia kane ka jingdawa jongki paitbah nongshongshnong ka thain Mawsynram da kaba kan ai mardor iaka Civil Sub Division ia kane ka thain khlem da buh kino kino ki kyndon naba kane ka thain ka la don lypa iaki tnad ophis bapher bapher bad ka la don ruh iaki criteria ba donkam ban kyntiew iaka sha ka Civil Sub Division.
