Shillong, Jymmang 10: Ki katto katne ki khynnah ba la pyndep iaka eksamin Higher Secondary School Leaving Certificate (HSSLC) hynne ka sngi kila pynpaw ka jingsngewdiaw halor ka jinghap ban leit sha bar jylla ban thoh iaka eksamin CUET.
Kum ban shu kdew ba ki khynnah ba dang kwah ban bteng ia ka jingpule ha ki kyrdan College lane University ki donkam ban thoh iaka eksamin CUET ba kin ioh admission ha ki University ba pher ba pher.
Haba kren sha ki nongthoh khubor ha shillong press clubs u samla Banshanshuwa Kharmalki u la iathuh ba ki don katto katne ngut ki samla pule kiba ioh Centre ban thoh eksamin CUET sha bar ka jylla.
U samla Banshanshuwa Kharmalki u la ong ba kane ka jingioh Centre ban thoh eksamin CUET sha bar Meghalaya ka buh jingeh shibun ia ki samla ki ba dang don ka jinthmu ban iakhun ia kane ka exam bad ban bteng ia ki kyrdan pule ba kham shalor.
“Kane ka buh jingeh bad ka pyndiaw mynsiem shibun ia ki ba kwah ban bteng iaki jingpule khamtam ia kito kiba wan na ki longïing longsem ba duna ka ioh ka kot” ong u samla Banshanshuwa Kharmalki.
Halor kane, ki samla pule ki kyntu iaka sorkar jylla khamtam ia u myntri ka tnat Pule Puthi ban shimkhia bad ban pynbeit mardor ia kane ka kam namarba ka por ban leit thoh ia kane ka exam ka la jan, ba sa tang kumba ar ne lai sngi, khnang ba ki khynnah kin nym donkam ban leit thoh iaka eksamin CUET shabar ka jylla.
