Shillong, Naitung 24: U Myntri kam poh iing ka sorkar pdeng u Amit Shah mynta ka jan meit u la ia kynduh ia ki seng bhalang jong ka jylla Meghalya ban sngap ia ka jingpynsngew ka jong ki ia kaei kaba ki don ban pynpaw ha khmat jong u myntri ka sorkar pdeng.
U Shongknor ka kynhun ki seng bhalang hapoh kala lama jong ka COMSO u bah Roberjune Kharjahrin u la ong ba ka jingiakynduh ia u myntri kam poh iing ka sorkar pdeng mynta ka miet ka long kaei kaei kaba duh mynsiem namar u khlem ai ia kano kano ka jubab halor ka jingdawa ia ka Inner Line Permit ha kane ka jylla Meghalaya.
Kum ki seng bhalang kiba la ap ia kane ka sngi ban ioh ban ia kynduh ban ia kren ha kaba ia dei bad ka jingdawa ia ka ILP ha kane ka jylla Meghalaya ki kwah ban ioh sngew ei ei ba u myntri kam poh iing ka sorkar pdeng un ai ia ka jingpynshai la ka long ha kano kano ka rukom.
Ha kane ka jingiakynduh u myntri kam poh iing u khlem ai kano kano ka jubab ban ong hooid ne em ruh hynrei kaba sngew tynnad ka long ba u la shah skhor ia kaei kaba ki la pynsngew ha kaba ia dei bad ka phang ILP la kren na ka liang jong u bad u president ka seng KSU u samla Lambokstarwell Marngar.
Ha kane ka jingiakynduh la ia kren ruh da kiwei kiwei ki jongialam,ha kaba ia dei bad ka jingdawa ban pynrung ia ka ktien Khasi bad Garo ha ka khyrngit kaba phra jong ka Riti synshar jong ka Ri India, la ia kren ruh ha kaba ia dei bad ka kam pud kam sam hapdeng ka jylla Meghalaya bad Assam.
