Shillong, Lber 19: Mynta ka sngi ka Meghalaya State Watershed bad Watershed Development Agency, kaba hap hapoh ka jingpeit jong ka tnad pynneh pynsah khyndew bad ki um ki wah la pynlong ia ka pynsngewthuh paidbah bad die paidbah ia ki tiar shna kti lyngba ki kynhun treilang.
Kane ka jingdie la pynlong hapoh ka kyrteng kaba la tip kum ka “New Generation Watershed Development Programme of the Watershed Development Component- Pradhan Mantri Krishi Sinchayee Yojana 2.0.”
Haba kren ha ka jingialang ka myntri ka kong Dr. Mazel Ampareen Lyngdoh kala pynshai ba ka khyndew bad ka um ka dei ka bynta ba kongsan ha ka rep ka riang bad ka dei ka bynta ka jong baroh ban pynneh pynsah bad ban iada.
Ka myntri kala ong ba ka dei ka kamram jong ka tnad sorkar ban wanrah ia ki skhim da kaba ia treilang bad ki shnong ki thaw, ki balang, ki riew paidbah ka “The Watershed Yatra” ka dei ka dak jong ka jingkut jingmut ban pynneh pynsah ia ki tyllong um da kaba hikai ia ki paidbah.
U Commissioner bad Secretary ka tnad pynneh pynsah khyndew u la ong ba ka sorkar Meghalaya kala lah ban pyntrei kam bha ia ka PMKSY kaba dei ka skhim jong ka sorkar pdeng bad ka jylla Meghalaya ka dei kawei na pdeng ki 10 tylli ki jylla kiba pyntrei kambha.
La iathuh ba ka jylla Meghalaya kala den ia ki tyllong haki wah duid haduh 2,776 tylli da ka jingiatreilang bad 1,000 tylli ki kynhun ia treilang kiba la noh syniang ha ka jingpyntrei kam ia kine ki skhim lyngba jong ki. Ha kane ka sngi la pynlait paidbah bah ruh ia ka kaiphot jong kane ka tnad sorkar kaba ia dei bad ka Watershed Yatra.
Kiwei ki heh sorkar kiba la donlang ha kane ka sngi ki long u R.S. Gill, IFS, Principal Chief Conservator of Forests bad khlieh ka Forest Force, Meghalaya; u Z.D. Shira, Director ka tnad pynneh pynsah khyndew bad ki um ki wah u bah L. Shabong, u bah P. Rapthap, bad S.K. Marak.
