Shillong, Nailur 04: Ka dorbar synrai ka iing dorbar thawain ka jylla Meghalaya kan sdang ha ka 9 tarik mynta u bnai bad kane ka jingiashong dorbar kan long tang 6 sngi bad kane ka lah ban long ka jingshong dorbar kaba khatduh jong kane ka iing dorbar kaba mynta ha kaba ka jylla kan sa leit sha ka elelction ha u bnai Rymphang 2023.
Na ki dak ki shien kila paw ba ki MLA, na ki party bapher bapher kila dep ban pynkhreh ia lade ban leit sha kano ka party ban ia khun ia ka MLA elekshon ha u snem 2023, ka jingbym nud jong ki MLA ba mynta ki dang tieng ia u shabuk kaba ka party kan ai ha kane ka sien shongdorbar synrai.
U bah Himalaya Shangpliang MLA ka TMC kala paw shai ba un ia khun na ka BJP hynrei ha kane ka dorbar synrai dang hap hapoh ka jingai shabuk ka party TMC, u bah Reniktone L Tongkhar bad u bah Samlin Malngniang ki MLA ka HSPDP la thikna ba kin nym ia khun shuh na ka juh ka party.
Ki MLA Congress kiba la shah beh na ka seng ha kane ka dorbar synrai kin nym hap ha kano kano ka jingai shabuk namar ba kin nym don party, lada ki ioh kin shu long na ka liang jong ka sorkar namar ki ia don lang ha kane ka kynhun sorkar MDA kaba ki la leit ban ai ka jingkyrshan.
