S
hillong, Risaw 16: Ryngkat bad ka pyrthei shityllup ka tnad rep jong ka South West Khasi Hills District mynta ka sngi kala pynlong ia ka jingrakhe ia ka Sngi pyndap bam ha satlak ka pyrthei ia kaba la tip kum ka “World Food Day”.
Ha ka jingkren jong ka kong Isawanda Laloo Deputy Commissioner jong ka SWKH District ka la ong ba ka long kaba don kam ba ki nongrep kim dang pynkhlain shuh shuh ia ka jingpynmih ia marbam khnang ban dup lah ban pynduh ia ka jingshah thngan ha u snem 2030.
Ki nongrep ki long shisha ki budlum jong ka ioh ka kot jong ka Ri, ka jylla bad ka dong ka thain namar ia ka bam baroh ki shaniah beit tang ha ki nongrep. Wat la ha India kala kiew shisha ka rep ha dien ka Green Revolution hynrei da ki million ngut ki briew ha kane ka Ri India ki dang thiah khlem bam man ka sngi.
Ka DC kala ong ruh ba haduh 212 million ki briew ha ka Ri Indai baroh kawei ki khlad noh shiteng por tang na ka daw jong ka jingbym ioh bam ha ka shisnem, kane ka dei na ka jingduk jingkyrduh bad ia ka jingpynhiar ia ka jingpynmih bam ka dei na ka daw jong ka jingpynjot pathar ia ka mariang.
Ka kong Laloo kala kyntu ia ki paidbah bad khamtam ia kito kiba la nang la stad ba kin shim ia ka kabu na ka bynta ban shimti ia ka kam rep na ka bynta ban kyntiew ia ka kam pynmih bam ban pynlait ia ka jingduna bam. Kala ban jur ba dei ban pynneh pynsah ia ka mariang.
Ha kane ka sngi kala don ruh ka jingbatoi da ki ophisar jong ka tnad rep u Bah G. Nongrang, District Horticulture Officer, Mawkyrwat bad Agricultural Technology Management Agency (ATMA), Mawkyrwat, kiwei pat ki nongkren ka dei ka kong R. Langstieh, Director jong ka tnad rep. bah B Shylla u la kren pdiang sngewbha ha kane ka jingialang u ba dei u DAO jong ka District.
