S
hillong, Risaw 22: U Bah HS Shylla CEM jong ka KHADC mynta ka sngi ha dien ka jingialang jong ka Executive Committee, u la iathuh ba ka dorbar ba kyrpang jong ka KHADC kan long ar sngi lynter ha ka 25 bad 26 tarik mynta u bnai.
Ha kine ki ar sngi ba don kane ka dorbar ba kyrpang ka EC kan leit ban rah hapoh ka iing dorbar ia ki saw tylli ki bill, ka jingpynkylla kaba nyngkong ia ka ka Khasi Social Custom Lenaege Bill, 2018.
Ha kane ka Bill la pynrung kyrpang ruh ia ka “Rongbia” kaba leh tang hapoh Bhoi ia mynta, kane ka long ba lada don kano kano ka jait kaba la thikna ba kan duh jait noh la shah u wei na ki khun synrang ban shim tnga da ka bym dei khasi ban ai da ka jaidjong u ta u shynrang.
Ka EC kan wanrah ruh ia ka rai hapoh jong ka iing dorbar ha kaba ia dei bad ka jinypyntrei kam ia ka Inner Line Permit (ILP) kane ka long katkum ka shithi kaba la thoh da ka sorkar sha ki District Council ha u snem 2017.
Ha kane ka dorbar ba kyrpang ka EC kan wanrah ruh ia ki rule jong ka Rules jong ka Twon Committee khang ba ka KHADC kan ioh ban pyntrei kam noh ia ka Construction Building Bylaws na ka bynta ki kam ban shna iing shna sem kiba hap hapoh jong ka jing peit jong ka District Council.
Kawei pat kaba Bill ba ka EC kan sa wanrah hapoh ka iing dorbar ka dei halor ka Subordinate Council of Chief and Traditional Chief and Headman Bill, 2018. Ia kane ka Bill la pyrshang ar sien mynshuwa ban wanrah hynrei la shah pynphai noh namar ba la shim na ka Para-3 jong ka Sixth Schedule ia kaba ym lah ban don ar tylli ki Council.
Ia kane ka Bill kaba mynta pat la shim na ka Para-2 jong ka kyndon kaba hynniew jong ka Sixth Schedule. Haba ia dei pat bad ka kam rangbah kur ka EC kan sa wanrah da kawei ka bill ha ka dorbar jong ka KHADC ka ban long ha u Naiwieng.
