Shillong, Jylliew 01: Kum shi bynta ban ia tynrong lem ia ki jingeh kaba ki Dorbar shnong ki ia tyngkhuh ha ka ban pynbiang pynbit ia ki jingdonkam jong ka shnong ha kine ki sngi ki por kaba ka khlam jingpang Covid -19 ka saphriang stet bha,ka KSU Central Executive Council hapoh ka jingialam jong u samla Donald V. Thabah General Secretary KSU CEC ha ka 1.Jylliew.2021 ka la aiti ia ki PPE bad ka song pisa sha ka Dorbar shnong Nongmensong.
Ha kaba la pdiang sngewbha ia kine ki jing ai sngewbha da u Secretary ka shnong Nongmensong ryngkat lang bad kiwei kiwei pat ki para nongkit kam jong ka shnong.
U samla Donald ha ka jingkren kaba lyngkot shwa ban ai ia kine ki jingai sngewbha u la ong ba ka Seng ka sngewthuh iaki jingeh kaba ki Dorbar Shnong ki iakynduh ha kum kine ki por.
Halor kane ba ka sa pynlong ia ka Seng ban long kaba la kloi ban iatynrong bad ia treilang bad ki bad kane ka jingaiti ia ki jingdonkam watla kadei ka ba rit hynrei kam dei pat kaba khatduh ia ka seng ba kan dang iai ia ia treilang bad ki Dorbar Shnong na ka bynta ka bha ka miat u paradoh parasnam ka bri u hynniewtrep hi baroh kawei.
Shuh shuh une u Samla nongialam ka KSU u la ai ia ka jingiaroh ia ki Dorbar shnong bad bynrap ba dei lyngba jong ki Dorbar Shnong ba ka Sorkar,ki nongshna aiñ kin sa lah ban pyniaid beit pyniaid iaid ryntih ia ki kam ha ki shnong ki thaw.
Ka seng kaba don ia ka jingkitkhlieh na ka bynta ka khia ka shon ki paradoh parasnam kam lah ban shu shong kli kti ha kum kane ka por hynrei pat ban mih shakhmat ban kner ia ki kti jingiarap ha ka bor ibarit jong ka.
Na ka liang jong u Secretary shnong bah A.Nongdhar u la pynpaw ka jingsngewnguh bad kyrkhu kyrdoh ba ka Seng kan dang ban trei kham bha naka bynta ki paradoh parasnam. La pyniaid iakatei ka jingialang da u President jong ka Seng samla shnong Nongmensong samla P.Warjri haka jing iadon ryngkat ki nongkitkam shnong.
