Shillong, Nohprah 17: U bah HS Shylla Chief Executive Member jong ka Khasi Hills Autonomous District Council (KHADC) ha dien ba u la wan ban jurip na duh Nongjri sha Umsyiem u la shem ba ka jingleh ka long shiliang namar bun ki jaka ki paidbah kin duh noh ia ka jaka jong ki sha Bangladesh.
Haba kren ha ki nongthoh khubor ha dien bala iohi da la ki jong ki khmat ha kaba ia dei bad ka jingthmu ban ker ksainar shiah ha katei ka thain, na ka liang jong u bah Shylla u la ong ba ha ka sngi balang un sa thoh sha ka sorkar jylla ba dei ban don ka jingjuriplang hapdeng ka sorkar jylla, ka KHADC bad ki bor jong ka Government of India (GOI).
U Bah Shylla u la ong ba ki jingtrei baroh dei ban pynsangeh noh shuwa katba kane ka jingjurip lang da baroh ki lai tylli ki bor ym pat lah ban pyndep. Kumba ka long lada ker ksainar shiah kumba la iohi mynta ka shnong Pyrdiwah bad ki surok kin hap sha shiliang ka jingker.
U bah Shylla u la ong ba ia kane ka jaka la long kumba ym don ba peit ba khmih ka sorkar kala leh bein ia kane ka thain, kumba kala paw na ki jingbuh maw pud ha ka jaka ban buh ha pdeng ka wah la wan kiew sha India kane ka jingleh ka long ba la shu kohnguh ia ka Bangladesh.
Ha kane ka jingleit u Bah Shylla u la sakhi da la de ia ka jingwan kiew jong ki briew na Bangladesh khamtam ha Lyngkhat ha kaba u la khot lang ia ki ban ia shondur hynrei kila phet krad na khmat jong u CEM ka KHADC.
U bah Kmen Myrshiang secretary jong ka CCIB u la ong ba kim pyrshah ia kata ka jingker ksainar shiah, hynrei kaei kaba ki kwah ka long dei ban ker na siro point khnang ba kin nymduh ia ki jaka puta, ka pisa kilah ban ioh hynrei ia ka jaka yn nym lah shuh ban ioh lano lano ruh.
Ha kane ka jingleit la synranlang da u EM ba dei peit ia ka khyndew ka shyiap jong ka KHADC bad ka MDC jong kane ka jaka ka kong Grace Mary Kharpuri, ha kane ka sngi la don lang ruh ki rangbah shnong jong ka thain kiba shah ktah ha kane ka jingker ksainar shiah.
