Shillong, Jylliew 17: Ka jingleit ban ialam ki Pulit ka Special Investigation Team (SIT) hapoh ka jingialam u Superitendent of Police ka East Khasi Hills District ia ka Sonam Raghuvanshi ha ryngkat ia kiba ia donkti ban pyniap ia u Raja Raghuvanshi sha ka thain Weisawdong, Sohra kila iathuh ba ki la pyndonkam da ar tylli ki wait ban pyniap ia u Raja.
Ia kane la pyntip da u Bah Vivek Syiem uba dei u SP jong ka EKHD, hadien ba la dep ban ialam ia ka Sonam ha ryngkat bad ia ki saw ngut kiba donkti ban pyniap ia u Raja Raghuvanshi, ban pynwan dur ia ka rukom pyniap ia u.
Mynta ka sngi ba la ialam ia ka Sonam bad ha ryngkat ia kiba donkti ban pyniap ia u Raja Raghuvanshi, ka kynhun pulit SIT kala leit sha ki katto katne tylli ki jaka ha ryngkat bad ki bor pahara ba jur bha kum ka Mawlakhiat, Weisawdong Parkinglot bad kumjuh ruh ha Riat Arliang kaba don hajan ka kshaid Weisawdong.
Haba kren sha ki lad pathai khubor u Bah Vivek Syiem u la pyntip ba kine ki briew kiba donkti ban pyniap ia u Raja kila phla ba ki pyndon kam da ar tylli ki wait ban pyniap ia u, ia kaba ki pulit SDRF ki dang wad sa ia kane ka wei ka wait katba ia kawei pat la lap hi da ki pulit ha ka por ba lap ia ka met iap u Raja.
U Bah Vivek u la iathuh ba tang shu poi ha Weisawdong Parking lot, ka Sonam kala ai ksai ban pyniap noh ia u Raja, ha kaba ka Sonam ka iaid na khmat eh bad pat sa u Raja bad nadien jong u la bud sa kine ki lai ngut ba kynthup ia u Vishal, Akash bad u Anand.
Shuh shuh u Bah Vivek u la iathuh ba ia u Raja la khyrwit tyngeh bha na ki bynta ba shadien bad sa khyrwit pat sa na ki bynta ba ha khmat haduh ban da iap bad ia met iap u Raja la bret da ki lai ngut ki shynrang kiba la buddien ia ka Sonam bad Raja naduh Nongriat, ha kaba ar ngut ki bat na ka bynta ka kti bad u wei pat na kjat bad sa bret pat sha riat.
U Bah Vivek u la iathuh ba ki pulit lem bad ka kynhun SDRF kila sdang ban wad sa ia kawei ka wait ba kila pyndonkam ban pyniap ia u Raja bad kham hadien eh jong ka jingwad bniah ka kynhun SDRF kila lap noh sa ia kawei ka wait ba ki pyndonkam.
