Shillong, Risaw 26: U Shongknor jong ka iing dorbar thawain ka jylla u bah Metbah Lyngdoh mynta ka sngi u la pynsmai ia u MLA ba thymmai jong ka 26-Shella konstitwensi ha kamram trei kam mynta ka sngi.
U bah Balajied Kupar Synrem u la bam smai kum u MLA ha ka kyrteng jongu blei ha khmat jong u shongknor jong ka iing dorbar thawain ka jylla ha ka jingiadon lang u Myntri rangbah ka jylla u Conrad K Sangma bad ki myntri sorkar , u Bah Brolding Nongsiej, Bah AL Hek ba du Bah Kyrmen Shylla ha ka jingiadon lang ki MLA na ka sorkar MDA.
Na ka liang pyrshah kiba la wan ban ia sakhi lang ia kane ka jingshim smai jong MLA ba thymmai jong ka Shella la wan da ka Dr Ampareen Lyngdoh bad u Bah George B Lyngdoh ha kaba kila ai khublei kit bok ia u tei u MLA ba thymmai.
Ha kane ka sngi la don lang ka kmie jong u Bah Balajied ka kong R Synrem kiba ha iing ha sem bad ki nongkyrshan na ka party UDP kiba dei na ka konstitwensi kiba u la jop ia kane ka ilekshon shiteng samoi.
