Shillong, Iaiong 20: Ka Synjuk Ki Rangbah Kur Ka Bri U Hynñiewtrep ka la sdang pyiar kylleng ka Ri Khasi ha ka ba la seng ruh ki shnat ha la ki thaiñ ki thaiñ. Ki la don ki rangbahkur na ki thaiñ bapher ha Ri Khasi ki ba la їa lum kur ban thaw shnat bad ki shnat na West Khasi Hills bad East Khasi Hills la pynskhem ha u snem 2020.
Ha ka shnat na West khasi Hills la long khiehduh da u Bah Boldness Lyngdoh Nongum bad la jied saiñpynїar da u Bah M Kharbani; ha ka shnat East Khasi Hills pat la long khliehduh da u Bah Kynsai Manik Syiem bad la jied saiñpynїar da u Bah Living Stone Kharpran.
Ha kane ka sngi saitjaiñ, 24tarik їaїong, 2021 la pynkhreh ban pynskhem їa ka shnat South West Khasi Hills da u Khiehduh seng kmie, u Bah Herman Nongrum ha ka jingїadon lang jong kiwei kiwei ki nongkitkam rangbahkur na ka seng kmie.
Ha ka shnat na South West Khasi Hills la їalam kum u Khliehduh da u Bah Manstudy Nongrem bad lajied Saiñpynїar їa u Bah Їoannis Shylla. Lah ban pynkynmaw ba їa ka Synjuk Ki Rangbah Kur Ka Bri U Hynñiewtrep la prat lynti da u Bah H S Shylla Bamkwaiha dwar U Blei ha ka por ba u dang long u Kher Rangbah ne Chief Executive Member jong ka Khasi Hills Autonomous District Council.
La seng nyngkong їa ka Synjuk Ki Rangbah Kur ha ka 7tarik Kyllalyngkot, 2019 ha ka ba u Bah H S Shylla u la long u Khliehduh ba la kyrshan salonsar da baroh ki rangbahkur bad u Symbud Khliehduh їa u Bah Living Stone Kharpran, Saiñpynїar їa u Bah Aristotle Lyngdoh Mawphlang bad u Symbud Saiñpynїar ia u Bah Їalamlin Lyngdoh, kynthup bad katto katne ki nongkitkam rangbah.
Ha kaba їadei bad ka Dorbar bah jong ka shnat South West Khasi Hills ,ka la don ka jingkyrpad na ki nongїalam ban wer lem їa kito ki kur ki ba don ha ka thaiñ ba kin wan hi shakhmat ban їasnoh bad ka Synjuk na ka bynta ban kyntiew їa ka riti dustur ha ka imlang sahlang.
Ka kyrwoh na ki Rangbah Kur jong ka Synjuk shnat na South West Khasi Hills ka la kyntu їa baroh ki kur Khasi ba kin shim ka jingkitkhlieh na ka bynta ban wan monlade sha ka dorbar bah ka ban long ha Nativity Hall, Mawkyrwat ha ka por khatwei baje mynstep ha ka 24tarik Їaїong, 2021.
