Shillong, Nohprah 14: Mynta ka sngi u Chief Executive Member ka KHADC u ban Pyniaid Sing Syiem la khot ia ka jingialang ia ki rangbah kur, ki rangbah shnong, ki hima, ki seng kynthei seng samla ha State Convention Center ban ia mir jingmut ban pynlong ia ka dorbar bah ha Madan Polo.
Ha kane ka jingialang ha dien bala ioh ia ka jingiamir jingmut ba baroh la shim ia ka rai ba ia ka jingialang jong ki kur, ki rangbah shnong, ki hima, seng kynthei seng samla yn pynlong ha ka 11/Kyllalyngkot/ 2025 ha Madan Polo.
Haba kren ha kane ka jingialang u CEM bah Pyniaid Sing Syiem, Symbut CEM ban Pynshgnainlang Syiem, u bah Titosstarwell Chyne nongialam ka liang pyrshah kila pynsngew sha ki riew rangbah ki long kmie kiba la don ha kane ka jingialang ia ka jingthmu ban pynlong ia katei ka dorbar bah.
Katei ka jingialang ka long ban pynsngewthuh halor ki lai tylli ki ain kiba la ioh ia ka jingmynjur jong u lat ka jylla, The Khasi Hills Autonomous District (Khasi Social Custom of Lineage) Act, 1997 kabala pynkylla, Khasi Hills Autonomous District. (Regulation and Administration of Land) Act, 2021 bad ka The Khasi Hills Autonomous District (Administration of Elaka) act, 1991 ia kaba la pynkylla.
La bthah ia baroh ki kur kiba don ha kane ka Ri Khasi kiba hap ha u pud u sam jong ka KHADC ban kin ia wan sha kane ka jingialang 10 ngut na kawei ka kur, la khot la wer ia baroh ki Hima, ki shnong, ki seng kur, ki seng kynthei bad ki seng samla ba kin ia wan ha kane ka dorbar bah.
Ha kane ka jingialang la don lang ruh u bah Martle N Mukhim MDC ka HSPDP, bah Alvin S Sawkmie MDC na ka party NPP kiba la ia don lang ha kane ka jingiamir jingmut ban pynlong ia katei ka dorbar bah.
