Shillong, Kyllalyngkot 18: U bah Pyniaid Sing Syiem u la pynshai halor ka jingkynnoh ba ka jingialang Dorbar Iktiar Paidbah ba la khot da ka Khasi Hill Autonomous District Council (KHADC) ha Polo ka dei tang ka jingkwah myntoi saiñ pyrthei namarba la jan ka election sha ka KHADC, u Chief Executive Member.
U bah Pyniaid Sing Syiem Chief Executive Member ka KHADC u la kyntait war iakane da ka ba kdew ba u kongsan ha kane jingialang u dei u Lat ka Jylla u bym ju shahliang hano hano.
Haba kren sha ki ladpathai khubor u bah Pyniaid Sing Syiem u la ong ba, Ka jingkynnoh ba ka jingialang ka long ban ai jingmyntoi ha ka saiñpyrthei, ka dei ka ba bakla lada dei kumta nga tharai kam u Lat ka Jylla ruh un ym wan kum u kongsan namar u Lat u long u bym shahliang.
U bah Pyniaid Sing Syiem u la bynrap “Ha kane ka jingialang la khot lut ia ki nongialam ha ki seng saiñpyrthei ki sengbhalang, ban ong ka dei ka kam saiñpyrthei ngam tharai ba kan dei ka kam politic. Kane ka dei ka kam jaitbynriew bad ha ka por election ngi don ka uniform hynrei ha kum kane ka kam jaitbynriew kan bha ban buh sharud ia ka kam saiñpyrthei”.
Halor ka jingialang u Pyniaid Sing Syiem u la ong ba kane ka sngi ka dei ka ban sah jingkynmaw na ka bynta ka jaitbynriew, namar kane ka jingialang paitbah kaba la tip kum ka Dorbar Iktiar Paidbah.
Ka daw ka long ba hadien 72 snem ba la don ia ka District Council kaba la aibor ia ka MDC ban shna aiñ. hynrei, mynta dang ioh ia ka aiñ ban ithuh ia ka khyndew ka shyiap, ban ithuh ia ka jingtrei kam ki sengsamla sengkynthei ki rangbah shnong bad ki sengkur.
“Ngi sngewdei ban don kane ka jingialang ba hakhmat u ba bun balang ba ki paidbah kin sakhi ba la pynkupbor ia ki, Kane ka long hadien ba la ioh ia ki ar tylli ki aiñ ba kongsan kum ka Khasi Hill Autonomous District (Administration of Elaka) Amendment Act 2023 bad ka Khasi Hill Autonomous District (Khasi Social Custom of Linage) Amendment Act 2023 kaba dang shu ioh jingmynjur na u Lat ka Jylla bad ngim pat ioh ka lad ban pynshai paitbah halor kine ki artylli ki ain”.
Shuh shuh u la bynrap ba Ka jingmyntoi na kine ki ar tylli ki aiñ ka long halor ka jingtreikam ki sengsamla, ki sengkynthei, senglongkmie mynta la ithuh da ka aiñ, baroh shikatta la shu trei namar ba ka la ju don ha ki shnong ki thaw. hynrei, mynta ka la don ha ka bor ka aiñ, ba la ioh ban pyntreikam bad ai jingithuh ia ki sengkur bapher bapher, bun na ki sengkur ki dorbar kur la ioh ka jingithuh.
Kumta u la kyntu ruh ia kiwei ki kur ba kin wan ban register hapoh ka KHADC, ha shuwa kane ki dei ban lum ia ki dorbar kur, kin jied ia ki nongkitkam bad ai ka jingthoh halor ka jingiaid lynti ka kur “.
U bah Pyniaid Sing Syiem u la ong ba kane ka long ka jingiatylli, halor ka thymmei ka jaitbynriew bad ka jingai jait kmie kadei ruh ka Iktiar Paitbah ban kyrsiew ruh ia ka rai ban kynmaw ia ka lariti lajong.
Hangne ka pyni shai ba da ka jingdon ka 6 Schedule hapoh ka Article 244, la ai bor ia ngi ban shna aiñ, kaba la ai bor ban thaw aiñ ha ki ba bun ki liang ban dang don ruh ban hap ban pyrkhat ban dang pynbha shuh shuh.