Shillong, Rymphang 10: Ka Khun Hynniewtrep National Awakening Movement (KHNAM) kumba ju long man ka por ha shwa ban sdang ka election ka ju pynbam smai ia ki kyrtong ba kin long kiba iai neh bad ka party ynda kila dep ban jop ha ka election.
Ha kane ka kynti ba mynta ruh kumjuh ka KHNAM ha shwa ban sdang ka election MDC sha ka iing dorbar jong ka Khasi Hills Autonomous District Council kala pynbam smai ia 11 ngut ki kyrtong kiba iakhun ia kane ka election MDC 2025.
Ia kine ki 11 ngut ki kyrtong jong ka KHNAM la pynbam smai ha khmat ki mot dur ba shi rynieng jong ki khla wait ka jait bynriew ba kynthup jong u Tirot Sing bad u Woh Kiang Nangbah, da u General Secretary ka KHNAM u Bah James M.A. Neng.
Kane ka jingphah pynbam smai da ka KHNAM ka long kum shi bynta ban kin ym ryngkang na kawei ka party sha kawei pat ynda kila jop ia kane ka election 2025 hynrei kidei ban neh beit ha baroh san snem.
Ha kane kajuh ka sngi ka KHNAM kala pyllait paidbah ruh ia ka jutang kular ne ka manifesto jong ka party halor ka jingiaid lynti jong ka jingpynkhreh ia kane ka election MDC ka ban sa lng ha ka 21 tarik mynta u bnai Rymphang.
Ha kane ka kular jutang kala buh haduh 15 tylli ki mat ba kan leh eiei ynda ka party ka wah ha ka bor lada u paidbah jong ka ri Khasi un pynkup bor ha ka ban ioh bat ia u Lakam synshar ha KHADC.
