Shillong, Nailar 08: Mynta ka sngi kawei ka long kmie kala iam ha khmat jong u myntri rangbah haba pynsngew ia ka jingsniew ka surok sha ka shnong Iooksi kaba hap hapoh jong ka Laskein C&RD Block namar kane ka surok na Umsaliat kala sniew rathai mynta la palat 20 snem.
Haba kren haka jingiakynduh u myntri rangbah ka jylla ia ki paidbah lyngba ka CM-Connect kaba la pynlong mynta ka sngi ha Laskein Block kala ong ba la kular na ka por sha ka por ban shna noh ia kane ka surok hynrei haduh mynta ka dangjot sah, la pynsngew ka long kmie.
Ia kane ka jaka la mih khmat da u bah Commingone Ymbon ba dei ruh u myntri ha kane ka sorkar kaba mynta, haba jubab ia katei ka jingpynsngew ka long kmie la ong ba mynta la ioh ia ka jingmang pisa bad shna noh ia kane ka surok kaba 2.5 km.
Ha kane ka jingia kynduh u myntri rangbah ka jylla bad ki paidbah kiba la pynpaw ia ka jingeh ha khmat u myntri rnagbah ka jylla kila don kumba 40 ngut ki riew rangbah bad ki long kmie kiba la ioh ia kane ka lat ban ujor mar khmar ha khmat u myntri rangbah haba ia dei bad ki skhim bapher bapher.
U Myntri Rangbah ka jylla u Conrad K Sangma haba jubab ia ki jingpynsngew jong ki paidbah la ong ba un sa leh ia kaei kaba kila pynsngew sha ki paidbah kiba la wan ban ia shim bynta ba ki surok ki dei ki jingeh kaba ki paidbah ki ia kynduh.
Kawei pat kaba ki paidbah ki ia kynduh jingeh ka long ha kaba ia dei bad ka koit ka khiah ki lat jingsumar, ka jingeh bym biang ki jingbam ban tei met bad ka jingeh ha kaba pyntrei kam ia ka shim ring um sha ki iing na ka JJM bad kiwei de.
U myntri rangbah la ong ba ia ki iing skul ha kylleng ka jylla Meghalaya la ialeh ban shna bha, yn pynbha ruh ia ki jaka ai jingsumar sha ki nongkyndong kum ki CHC bad PHC bad hapoh kane ka Laskein Block ruh ka sorkar kam sa peit kano ka jaka sumar ban pynbha.
Kane ka CM-Connect ka long ba u myntri rangbah ka jylla yn ia kynduh mar khmat badki paidbah ban sngap ia ka jingeh kaba ki paidbah ki don ban pynsngew haba ia dei bad ki kam pynroi, haba ia dei bad ki surok la ong ba dng dong 1600 tylli ki shnong bym pat ioh surok. Ka thong jong ka sorkar ka long ban pynioh surok ia baroh ki shnong lyngba ka PMGSY.
Kiba bun kila pynpaw ruh ba ki don kam ruh ia ki madan ialehkai, ki jaka thoh eksamin ki khynnah bad bun kiwei kiwei ki jingdon kam katkum ki dong ki jaka jong ki shnong kila pynpaw ia ka jingdon kam jong ki ha la ki shnong ki shnong.
