Shillong, Naitung 17: Mynta ka sngi ka seng BJP kala pynlong ia ka jingrakhe ia ka lyngkhuh sngi iap ban 189 snem jong u Syiem Tirot Singh u syiem jong ka hima Nongkhlaw u nongialeh laitluid pyrshah ia ki phareng da kaba leit ban buh syntiew dur mot jong u ha State Central Library Shillong.
Ha kane ka sngi ka BJP kala buh ia ka jingdawa na ka sorkar pdeng ba kum ka jingburom ia u Syiem Tirot Sing nongialeh lait luid pyrshah ia ki phareng ban pynsah nam ia u da kaba buh ia ka dur mot jong u ha phyllaw jong ka dorbar Parliament.
Ym tang katta ka BJP kala dawa ruh ban pynmih biang ia ka stamp jong u Syiem Tirot Sing bad ha ka juh ka por ba ka tnad pule puthi kan pynrung noh ha ki kot pule ia ka jingleh jong u ia ki phareng ba ki long dien kin tip sha phang jong u.syiem ba khraw ka hima Nongkhlaw ha ka ri baroh kawei.
Ia kane ka jingdawa la ia kren ha ka jingialang hapoh ka ophis jong ka party u bah Khrawboklang Basaiawmoit Vice President, Bah David Kharsati bad u nongiaktien ka party u bah Mariahom Kharkrang, ka Dr. Fenela Lyngdoh Nonglait ruh kila kren ha kane ka jingleh burom.
Ha kane ka sngi ha dien ka jingbuh syntiew ha ha State Library kila pynlong ruh ia ka jingpynkhuid ia katei ka jaka, ia kane ka jingleh burom kila leit ruh sha Nongkhlaw ban pyndon burom ia une u nongialeh laitluid ba khraw.
