Shillong, Nailur 12: U myntri ba dei peit ia ka tnad Excise u bah Kyrmen Shylla haba jubab ia ka jingkylli u Zenith Sangma haba ia dei bad ka jingdon ki dukan kyiad phareng la ong ba ka jylla Meghalaya ki dukan kyiad bala ioh laisen na ka sorkar ki don 812 tylli haduh mynta.
Ki laisen kiba la ai ha kine ki saw snem naduh u snem 2018 haduh 2023 baroh ki long 201 tylli, ki dukan kyiad kiba la ai laisen haduh u bnai Lber 2018 ki don 611 tylli, la iathuh ba ka jinglum khajna na ki dukan kyiad mynta u snem kan kot sha ka T.340 klur tyngka.
U Myntri ba dei peit ia ka tnad pynroi nongkyndong u bah Hamletson Dohling haba jubab ia ka jingkylli haba ia dei bad ka jingpyntrei ia ka skhim MGNREGS ha Mawlai ha ki shnong kiba la ithuh kum ki jaka sor da ka jingai jinngbit jong u myntri ka sorkar pdeng.
U myntri ka tnad pynroi nongkyndong la ong ba ki shnong hapoh ka Mawlai kiba la ithuh kum ki jaka sor ki don 15 tylli, na kine 13 tylli kila dep phah da ka jingthoh sha ka sorkar ba ki kwah ia kane ka skhim kiba dang sah mynta kiba khlem phah jingthoh ki long ka Mawlai Nongpdeng bad ka Mawlai Mawdatbaki.
U Myntri Rangbah ka jylla u Conrad K Sangma haba jubab ia ka jingkylli u bah George B Lyngdoh haba ia dei bad ka kam pynbeit pud la ong ba haka bynta ka nyngkong ka sorkar kala shim khia bha da kaba ia kynduh ia ki paidbah kiba shah ktah ha khappud haduh ba kin da ia soi ia ka soskular ia sngewthuh jingmut.
U Myntri Rangbah la ong ba ha kane ka kylla kaba ar ruh shuwa ba kin poi sha kano kano ka jingshim rai ka sorkar kan ia mir jingmut bad ki paidbah kiba sah ha khappud ka sorkar kan nym iaid lait khlem da ia mir jingmut lang.
Haba jubab ia ki jingkylli bynrap, u myntri rangbah ka jylla u la ong ba ka sorkar kam lah ban ia kynduh ia u wei pa u wei brie whynrei kala ia kynduh ia ki kynhun kiba ia dei bad ki kam ha khappud la ong ba ha kine ki 50 snem khlem lah ban leh ei ei kane ka sorkar mynta ka ialeh ban pynbeit ia kane ka jingeh.
U Symbut myntri Rangbah ka jylla u bah Prestone Tynsong haba jubab ia ka jingkylli u bah Himalaya Shangpliang haba ia dei bad ka jingrah ia ka ophis jong ka NEEPCO sha Guwahati, la ong ba kam shym don kum kata ka jingrah ia ka ophis na Shillong, kaei kaba don ha Guwahahti dei tang ki shnat jong ka NEEPCO kam shym don kum katta ka jingrah ia ka ophis.
