Ha u Rymphang khot jingialang ia ki trai jaka halor ka kam ker ksainar shiah ha Amlarem:DC

Jowai, Kyllalyngkot 19: U Deputy Commissioner jong ka West Jiantia Hills District u Bah Garod L.S.M Dykes u la ong ba ha u bnai Rymphang un khot ia ki trai jaka ha ka jingialang ban long ha Amlarem ha kaba ia dei bad ka jingdon kam halor ka jingker ksainar shiah ha khappud bad ka Bangladesh.

Haba ia kren bad u SP News Agency, ha ophis trei kam jong u ha Jowai, la iathuh ba ka jingiakren baroh shikatta katba khot ka long beit ba ki dkhot jong ka Coordination Committee on International Border (CCIB), hynrei mynta yn khot noh tang ia ki trai jaka ban ioh ia ka jingshai ha kaba ia dei bad ka jingthmu ban ker ksainar shiah.

“Ka jingialang kaba ngan khot mynta kan long ia u Doloi, ki rangbah shnong bad ki trai jaka, ngan khot ia kane ka jingialang ka long ban ioh ia ka jingshai na ki trai jaka ha kaba ia dei bad kane ka jingker ksainar shiah, namar haba wan mih da kiwei yn nym lah ban sngewthuh shia” la ong u Deputy Commission jong ka West Jiantia Hills District.

U Deputy Commissioner u la ong ba ha kane ka jingialang yn pynsngewthuh ia ki trai jaka bad ha ka juh ka por ban ioh sngew na ki trai jaka aiu ki don ban ong, lada ki trai jaka ki paid kan kham suk ban pyniaid sha khmat ia ka kam ker ksainar shiah, hyrei lada ki trai jaka kim pdiang kane kan long ka jingeh.

Haba ia dei bad ka jingsiew ia ka bai jaka la ong ba, lada ki trai jaka ki kloi ban ai ki la lah ban pynkhreh ia ka jingkhein jingdiah hyrnei kumba ka long haduh mynta kam pat poi sha kata ka bynta ban ia kren ia ka jingsiew. Ka pisa ka don ban siew ia ka bai jaka lada ki trai ki long kiba la kloi ban ai ia ki jaka.

Ha ka juh ka por na ka liang jong u Deputy Commissioner u la ong ba kan long kaba eh ban khang ia ka jingwan rung ki briew na Bangladesh namar kam don jingker bad kan long kaba eh ia ki bor ba phara ba kin lah namar ka jaka ka long laitlan. U Deputy Commissioner u kymren ba ki trai jaka kin sngewthuh ia ka jingdon kam ban don ka jingker ksainar shiah.

Kum ban shu pynkynnaw ba ka jingjia ha Lat Darang ha kaba ar ngut ki briew kila mynsaw ba pom ki khar Bangladesh bad ka jingjia ha Amdoh ha kaba u wei u riew paidbah bad u wei u BSF u la mynsaw ha ka jingthombor ki khar Bangladesh ka pynpyrkhat ia kiba bun ki briew katei ka thain ba don kam ia ka jingker ksainar shiah ha khappud bad ka Bangladesh.

What Next?

Recent Articles

Leave a Reply

Submit Comment

*

Where to buy Vidalista Professional 20 Mg (Tadalafil) tablet