Shillong, Risaw 02: U Dr Mukul Sangma nongialam ka liang pyrshah hapoh ka iing dorbar jong ka seng Congress ha ka jylla Meghalaya u la ong ba ha u snem 2019 kan wan da kawei ka sorkar ha Delhi, kam dei shuh ka BJP.
Ha ka jingiakren bad ki nongthoh khubor mynta ka sngi, ban pynkshem ia ka jingkam, u Dr Mukul u la ong ba ki paidbah mynta kila sdang ban lap ia ka jingshisha ia kane ka sorkar BJP, ia ki kam thok jong ka ia ki paidbah, la kynnoh u tei u nongialam jong ka seng Congress.
Ki kam thok jong ka BJP khamtam eh ia ki paidbah ka dong shatei lam mih ngi jong ka Ri India, ka long ba kila pynbna tang ia ka jingmang pisa ba ka long katta katta, hynrei ka jingbei pisa pat ka long kaba duna haduh katta katta sha kane ka dong shatei lam mih ngi jong ka Ri India. U Dr Mukul u la kam ba ki don ki jingthoh bad u lah ban pynshisha ia kane.
Ka jingwan jong ka BJP ha ka bor ha kane ka snem 2014 ka long ba ki paidbah kila shah ialam bakla na ka daw jong ka jingshah kynnoh bamsap kum ka 2G Scam ia kaba la shah kynnoh kiwei ki party kiba ia don lang ha ka sorkar Congress ha Delhi ha kato ka por bad kum ka party ka shah kynnoh lang.
Ha kane ka MP elekshon ka ban long ha u snem 2019, ki paidbah kin sa ai ia ka jubab ia kane ka sorkar BJP kaba la ialam da u Narendra Modi kumu myntri rangbah duh jongka Ri. Hynrei u Dr Mukul um shym kam pat ba ka Congress kan ialam ia ka sorkar ha Delhi, u la shuong ba kan wan da kawei ka sorkar kam dei shuh ka BJP.
