Shillong, Lber 02: Haba iadei ka mat jingthmu ban wanrah ia ka lynti rel ha hi ka jylla, kane ka mat kam dei shuh ka mat ka ba dang shu mih mynin mynta, hynrei ka dei ka mat kaba ka seng KSU ka la ïeng pyrshah naduh ki phew snem mynshuwa, ngi iohi bun ki jingma ki ba ap lada ka lynti rel ka wan poi ha ka jylla, khlem pat da don ki ain kiba skhem ban ïada.
Ia kane la pynpaw da u President rangbah ka seng Khasi Student Union u bah Lambokstarwell Marngar ha ka jingiakynduh ha ophis treikam ka seng ha Jaïaw.
Une u nongialam ka KSU u la pynkynmaw ba ha ka snem 2017 ka la don ka jingpyrshang ban sdang ban trei lynti rel hangtei ha Byrnihat, hynrei ka seng ka la ïeng skhem ban pyrshah ia kane.
Kumjuh ruh ha kine ki sngi la iohi ba ka la don ki khubor ba ka sorkar ka don jingthmu ban wanrah lynti rel ha Khliehriat, katba une u nongialam ka KSU u la pynpaw da kaba u la ong. “Da long sa kat ba long kumno kumno ruh, ka seng KSU hi kan ïeng pyrshah ban wanrah lynti reh hapoh ka jylla”
Halor kane u la ong ruh ba, ka sorkar ka dei ban pynurlong shuwa ki aiñ ki kanun, ba ka sorkar jylla ka la phah da ka Resolution ha u snem 2019 ka dei ban urlong noh. Ka sorkar ka dei ban leit sha Delhi ban iakren halor ka mat ILP.
Hynrei la iohi kumba ka sorkar jylla ka leit ban iakren ban ioh lynti rel, u la ong ba ngin khim lynti kumno ba kita ki aiñ ba donkam kin urlong lada kita ki juh ki nongshynshar kim pyrkhat ia ka jingshngain ki paitbah nongshong shnong.
U la ong ba, ka seng KSU ka kren da kaba shai ba lada ka sorkar ka mut ban iaid da ka bor halor kane ka kam, ka por kan sa batai ba ngin lah ban iatyngkhuh la ka dei ha madan. Namar ngim kwah ban ialehkai ia ka lawei jong ka jaitbynriew.
U la ong ba, ka ba kongsan ia ka sorkar ka long ba ka dei ban pynurlong, pynskhem shuwa ia kita ki aiñ ban iada, ka lynti rel lada ngin iakren kham hadien kan nym don jingeh.
Haba kylli halor ka 300 klur ba ka sorkar ka hap ban pynphai namar ka jingbym ioh pyntreikam lynti hapoh Byrnihat. U bah Lambokstarwell Marngar u la ong ba khie leit pynphai, hynrei pan ia ka ILP, u la ong ba mynno ka sorkar jylla ka leit pan ia ka 300 klur, ngi ngin kren shai, ai shuwa ka ILP, sa iakren ia ka lynti rel.
U la ong ba kita ki jingkren na u myntri rangbah ka sorkar jylla ioh kumno re kumno ki dei tang kumno ban pynthame, hynrei u paitbah un sa bishar, hynrei lada kine ki ba don ha ka bor synshar ki lehkai ia ka bor u paitbah ki paitbah un sa jubab shisien ka sngi.
