Shillong, Jylliew 21: Ki dkhot jong ka JSU mynta ka sngi kila ialam iaki nongdie jhur shaduh phalor u Deputy Commissioner jong ka West Jaintia Hills ban iakren ban siew iaki jhur balah shah knieh ha ki pulit.
Ki nongkitkam ka Seng JSU Jowai Circle ryngkat ka jingiatreilang bad ka JSU Sengkmie mynne ka sngi kila leit khnang ban kynduh ia kiba shongdie die jhur die soh ha Iawmusiang,Jowai hadien ka jingioh jingtip ia ka jingshah leh bor kiba shong die da ki katto katne ngut ki pulit ia kiba die jhur die soh ha iawmusiang.
Halor kane ka jingleh jong ki pulit da kaba knieh ia ki jhur ki soh jong ki bad la thep ia ki ha ki kali pulit bad ka seng ka lah dawa naka sorkar ba kin siew ia ka bai luk san jong ki nongdie jhur.
Ki nongialam ka seng bad ryngkat bad ki dkhot ki lah lumlang ia kine ki nongdie jhur bad ki lah iarung beit beit sha ka kompon ka ophis u DC bad ka seng ka lah ioh ban iakren bad u DC bad u lah kular ban shim khia halor kane ka phang hadien ka jingiakren bad ki nongialam ka seng bad ki nongshong iew ha iawmusiang.
U DC ka west jaintia Hills hadien ka jingiakren bad ki dkhot ka Seng u la phah ban shim ia ki kyrteng kiba shah knieh ki khur ki soh bad yn sa lah ban siew ia ka bai luksan sha kine ki nongdie jhur.
Shuh shuh ka seng ka lah ai jingmut ia ka bor District ban pynbiang ia ki jaka ba pura khnang ba kiba Shongdie kin iohlad ban ia die ia thied bad ban lait na ki jingkulmar bad ki bor ka aiñ bad ha kajuh ka por ban bud ryntih ruh ia ki hukum ka koit ka khiah, khnang ban lait ka ka jingiabit COVID-19.
Na ka liang ka seng ruh ka sngewtynnad halor ka jingshim khia u DC ban ailad iaki nongshong iew bad ki nongdie madan ban shong die haka jaka kaba biang hynrei ka shong haki nongdie madan bad ki nongshongiew ban pynioh ia kita ki jaka.
Ka seng ruh lah ka kyntu sha baroh ki paidbah ban iatreilang ha kum kane ka por bad ban burom iaka aiñ ka tnat ka koit ka khiah ban lait na ka jingbit na u Covid 19 bad ban lait noh na ka jingkhang dam kaba lah neh slem bha.
