Shillong, Jymmang 14: Ki seng bhalang jong ka West Khasi Hills District kiba kyntup ia ka WKHSU, ka WYF, ka HYY bad ka HANM jong ka West Khasi Hills District kila kam ba ki la lap ba ka don ka jingduna ki dawa Tika bad ia kane la iathuh ruh da ki briew kiba trei hapoh ka tnad ka koit ka khiah ba ki dawai kila lut ban iada na kane ka khlam COVID-19.
Ki tei ki saw tylli ki seng ki dawa na ka Sorkar jylla khamtam na u myntri ka tnad ka koit ka khiah u bah A.L Hek kumjuh ruh na Myntri rangbah ka jylla bah Conrad sangma ban phah mar mar ia ki dawai ai Tika ban iada na ka khlam COVID-19.
Na ka liang kitei ki saw seng ki dawa ruh ba ka sorkar ka dei ban pynkhreh lypa ia ki tyngong Oxygen lada don ba shitom jur ki paidbah na ka jingshah ktah na kane khlam radbah kaba la lyngshop ha baroh kawei ka ri India ha kaba da ki bun bun ngut ki briew kila duh ei ia ka jingim na kane ka khlam COVID-19.
Ha ka juh ka por ki nongialam jong ki saw seng ki kyrpad ruh ia ki paidbah nongshong shnong jong ka thain baroh kawei ba kin sngewbha ban ym khein sting ia kane ka jingpang khlam kaba la sar ia ka jingim ba kordor kynthup iaki tymmen ki kro ki samla bad ki khynnah bad ka lah ban jia ruh wat ia ki khyllung ruh lada ngi ngim shim khia ia kane ka mat.
Kumta kumba ka Sorkar kala pyntikna ba ka jingai Tika ka long kaba donkam ban iada na utei u khniang jingpang ba shyrkhei bad ngi ruh kum ki sengbhalang ba trei na ka bynta ka bha ka miat jong phi u paidbah ba phin sngewbha ba phin leit ban pynrung kyrteng ialade da kaba phin shim bad pdiang kylluid mynsiem iaki injection Tika ban iada na u Covid-19.
Kumba la ioh jingpynshai na ka tnad ka koit ka khiah jong ka sorkar jylla khnang ba ka jingshong shngain ha ka koit ka khiah jong ngi man iwei pa iwei kan kham neh shirta ong ki nongialam jong ki saw seng, kane ka long katkum ka kyrwoh kaba la phah da u bah Shembor Langrin jong ka seng HYC.
