Shillong, Nailar 13: U Symbud Myntri rangbah ka jylla u bah Prestone Tynsong u la iathuh ba ka sorkar kala shim ia ka rai ba ha ki 12 tylli ki shnong kaba la iap ki sniang haduh 24 tylli sniang ha ka daw jong ka African Swine Fever ka sorkar kan pynbna ia kine ki shnong kum ka Containment Zone.
Haba kren ha ki lat pathai khubor mynta ka sngi la iathuh ba haduh mynta kila don 73 tylli ki sniang kiba la iap ha kylleng ka jylla bad na kine 24 tylli la thikna ba kila iap na ka jingpang kaba la tip kum ka African Swine Fever bad bad ia ki 49 tylli kiwei pat dang phah test sha Guwahati.
U bah Prestone Symbut Myntri Rangbah u ba dei peit ruh ia ka tnad ri jingri jong ka sorkar, u la ong ba ha kito ki shnong kiba iap ki shniang kaba ka sorkar kan sa pynbna kum ki Containment Zone la khang ban shohdoh sniang bad la khang ruh ban iarah doh sniang.
Kane ka jingleh ka sorkar ka long ban iada na ka jingiabit kane ka khlam sniang sha kiwei pat ki sniang, u bah Prestone u la kren shai ba kane ka khlam sniang kam bit sha ki briew ka jingiabit ka long beit tang ha ki sniang.
Na ka liang jong u myntri ym shym la iathuh ia ki kyrteng jong ki shnong kiba iap ki sniang hynrei u la iathuh ba kine ki shnong kiba iap ki sniang ki long ha East Khasi Hills District, Ri Bhoi District, West Jaintia Hills District bad ka West Khasi Hills District.
Na ka liang jong ka sorkar kala bidong ba ym dei ban wanrah sniang na kiwei ki jylla, ne ban ia die sniang na kawei ka District sha kawei pat ka District. Ka sorkar ka antad ba kane ka African Swain Fever ka ioh ban rung sha kane ka jylla Meghalaya lyngba ka jylla Assam namar kane kala sdang na Arunachal Pradesh.
