Shillong, Nailar 14: U Myntri Rangbah ka jylla u Conrad K Sangma mynta ka sngi u la iathuh ba ka sorkar jylla kala ioh pdiang ia ka shithi ia kren ia suk kaba la phah da ka seng HNLC ha ka 16/1/2021 kaba la buh ia ki katto katne ki kyndon.
Haba ia dei bad kane ka jingtyrwa ia kren ia suk da katei ka seng ia ka shithi la pyntip sha ka sorkar pdeng, na ka liang jong ka sorkar pdeng kala ia shong jingialang ar sien ban ia pyrkhat halor kane ka jingtyrwa ia kren ia suk.
Ha ka jingialang bad ka sorkar pdeng, ka sorkar pdeng kala kren shai ba kan nym lah ban pdiang ia ki ar tylli kyndon kiba la buh da ka HNLC, kita ki ar tylli ki kyndon ki long “Instrument of Accession” bad ka ‘Standstill Arrangement”, dei hangne ba ka sahteng ban poi sha ka jingiakren ia suk.
Na ka liang jong ka sorkar kala phah ia kane ka jingpyntip hynrei hapdeng ka jingiakren na ka liang jong ka HNLC kala pyninoh ia ki kam pyntriem dei na kane ka daw ba kaei kaba ka tei ka seng ka kwah kan long kaba shai.
Ka sorkar Meghalaya ka kwah ban don ia ka jingshong suk shong sain ha ka jylla, hynrei haba don ka jingiakren ka dei ban long katkum ki kyndon hapoh ka riti synshar jong ka Ri India, na ka liang jong ka sorkar ka dang ap ia ka shithi kaba thymmai ban poi sha ka jingiakren ia suk.
