Shillong, Risaw 13: Ka HYC South West Khasi Hills ha ryngkat ka HYC Umdohlun Circle ki la ioh ban iakynduh ia ka Deputy Commissioner South West Khasi Hills mynta ha ophis treikam jong ka hapoh ka jingialam u Samla Arbok Kharjahrin, President ka HYC SWKH.
Ha ryngkat ki nongialam ba hakhmat ka HYC kiba kynthup ia u Samla Moonkingstar L Paliar, General Secretary HYC SWKH, u Samla Bantei Wanniang, Vice President HYC SWKH, Samla Rishotroy Kharjahrin, Organising Secretary HYC SWKH bad kiwei kiwei ki dkhot.
Ka HYC ka la leit ban iakynduh khnang ka dei hadien ba ka HYC hapoh ka jingialam u Samla Moonkingstar L Paliar uba ruh u nongialam ka HYC Umdohlun Circle kum u President ki la ioh ban leit khmih ia ki jaka pynlang eit uranium ha Nongbah Jynrin South West Khasi Hills District dang ha kine ki sngi.
Ha katei ka jingleit khmih ka Seng ka la lap da la ki jong ki khmat ia kitei ki jaka pynlang eit uranium kiba la orpait bad pei thliew ha kiba bun bynta. Ka seng haba iohi ia kane ka dap da ka jingsngewkhia ha kaba kane kan wanrah ia ka jingma kaba khraw ia ki paidbah nongshong shnong jong ka Nongbah Jynrin, Mawthabah bad kiwei kiwei ki shnong ba marjan lyngba ka lyer bih kaba beh na katei ka jaka.
Ka HYC kala ong ba kane kan ktah ruh ia ki doh-um doh-wah bad ia ki jingri jingdup khamtam ha kaba ki briew ne ki mrad kin dih ia ki um kiba tuid na katei ka jaka kaba la suba ba ka la kylla longbih.
Ban lait na ka jingma jong ka bih na kitei ki jaka ka seng ka la dawa na ka Deputy Commissioner ba ka dei ban thung da ka Independent Expert Inquiry Investigation Agency ban pynthikna ia ka jingktah lada kitei ki jaka pyllang eit uranium kin pei bad bthei ha kano kano ka por, Ka la dawa ruh ba dei ban pyndam noh mardor sa shisien ia kitei ki jaka pynlang jakhlia uranium bad ban pynthikna ba kitei ki jaka kin nym pei shuh.
Ka seng ha ka jingiakren bad ka Deputy Commissioner u Samla Moonkingstar L Paliar la iathuh ba ma u bad ki dkhot ki la ioh ban leit khmih ia kitei ki jaka la arsien kynthih tang hapoh une u bnai bad ong ba ka la don shisha ka jing orpait bad katei ka tank pynlang uranium ka la sdang pyut bad shen kan sa pra lada ym lah ban maramot mardor.
Kumta, ka HYC ka la dawa jur na ka Deputy Commissioner ba kan buh ia kane ka mat hakhmat duh khnang ba yn ioh ban pynkut noh ia kane ka mat uranium bad kan long noh ka jingshngain ia u paid ka dong ka thaiñ bad ia ka distrik hi baroh kawei.
