Shillong, Nailar 31: U Bah SK Sunn Chairman jong ka Environment Committee jong ka Iing dorbar thawain ka jylla u la ong ba mynta ka sngi kala don ka jingialang ha kaba ki briew jong ka Meghalaya State pollution Control Board, Central Pollution Control Board, Water Resource Department, PHE department, ki nongmih khmat na ka ophis jong u Deputy Commissioner jong ka West Khasi Hills District bad u secretary jong ka tnad ba dei peit ia ka jingtih ia ki marpoh khydnew ruh kila ia don lang.
Ki ar tylli kip hang ba kila ia kren ha ka jingialang ka long Shatang Valley Ferro Alloy Private Limited, haba ia dei bad kane ka kharkhana kim pat shim ia ka rai namar ki dang ap ban ioh ia ki kaiphot bad la ai por shitaiew ba kin pynpoi ia ka kaiphot, namar hangto ki pyndon kam ia ki Mawlein, u Rynga bad ki pynmih ruh ia ka bor ding lyngba u dewiong ha dien ba la ioh ia ka kaiphot kin sa ia shong biang ban shim ia ka rai.
Kawei pat ka long sha phang ki kharkhana Coke kiba don hangtei hapoh Shallang kiba la mih kum ki tid, ka jingdon jong kine ki karkhana Coke kila don palat ia ka 20 tylli, ha ka jingialang kaba la dep u Deputy Commissioner u la ai ia ka kaiphot ban a kine ki 20 tylli ki karkhana Coke kiba don ia ki kot ki sla kiba biang kiba la ioh ia ka jingbit na ka Single Window Agency bad Concern to Established bad Concern to Operate ki dei tang lai tylli. Carbo Chem, Shemphang bad kawei pat ka Ri Lyngngam Coke Industry.
Kiwei pat kiba la ioh ia ka Concern to Establishment tang kawei bad lai tylli pat ki dang apply bad kiwei pat kim don kot kim don sla te u Deputy Commissioner ha ka jingialang kaba la dep u la iathuh ba la dep ban phah shithi ar tylli, kawei ia kito kiba la ioh ia ka CTE la shah ia ki ba kin bteng ban sdang ia ki jingtrei ban shan ia ki iing na ka bynta ki jaka shong jaka sah ki nongtrei bad kito kiba la don ia ki CTO la shah ba kin pyntrei ia ka kam.
Katba ia kiwei kiba khlem pat don ia ki kot ki sla la ong ia ki ba kin sangeh noh, natang la dan sa kawei ka bynta kaba u Deputy Commissioner u la ong ban khot ia kito ki trai ba shna ia ki karkhana Coke u shem ba ki khlem wan te ia kito ruh la rai ban pynsangeh noh ia kato ka shithi la phah naduh u bnai Jylliew mynta u snem hynrei dang don hi kiba dang sdang ban iaid.
Ha ka jingleit jurip jong ka Committee la shem ba bun na ki karkhana kim pat ioh ki kot ki sla kiba biang kila ai ka jingiatrei lang, ha dien kata ka MSPCB kala ai ia ka jingthoh ha kaba kala bthah ban khang noh namar ba kila pynkhein ia ki kyndon jong ka ain ba kila pynjaboh ia ka lyer bad ki ka um ka wah ia ki 15 tylli ki karkhana Coke ia kane ka hukum ban khang la ai ha ka 8 tarik mynta u bnai Nailar 2020.
Na ka liang jong ka kommittee ka ong ba ka bor hangne ha kaba ia dei bad ka jingseng iaki karkhana hapoh ka jylla ka dei ka MSPCB wat la ka Commerce bad Industries Department wat la ka ai ia ka SWA kato ka dei tang ka jingbit hynrei ban seng ki don kam ia ka jingbit na ka MSPCB, kumta ka MSPCB kala ai ia ka jingthoh ban khang ia ki 15 tylli ki Karkhana Coke kiba don ha Shallang ba ki dei ban sangeh noh syndon.
Ha ka jingialang kaba la long mynta ka sngi la don lang u ADC bala wan mih ia u ADC ba ha dien ba la ioh ia kane ka jingpynbna jong ka MSPCB na ka liang jong ka District Administration ki dei ban bud ia ki kyndon bala rai da ka MSPCB bad ki khmih lynti ruh ba ki District Administration kan sa leh ia kaei kaba MSPCB kala ai bad ban pyntrei kam dei ka District Administration bad la khmih lynti ba hapoh 14 sngi dei ban khang.
Ki ne ki karkhana ki ba ka MSPCB ka la phah ban khang ka dei jong ka M/S Yash Coke, Kyllon Mathei, Shallang,ka M/s Karmela Coke Industries, Kyllon Mathei, Shallang, M/s Carbon Energy Solutions, Swangre, Shallang, M/s Crystal Coke, Kyllon Mathei, Shallang,M/S Crystal Enterprise, Kyllon Mathei, Shallang, M/s Electro Carbon Solutions Kyllon Mathei, Shallang.
M/s Meghalaya Coke Industries Factory, Nonghynrum, Shallang,M/s Meghalaya India Coke Industries, Kyllon Mathei, Shallang, M/s Mongri Coke, Nonghynrum, M/s Progressive Coke Industries, Swangre, Shallang,M/s Shallang Carbon Industries Kyllon Mathei, Shallang, M/s Unique Resources, Kyllong Mathei, Shallang, M/s B.K. Coke, Kyllon Mathei, Shallang,M/s H.V. Coke, Kyllon Mathei, Shallang, M/s Sohbar Coke, Kyllon Mathei, Shallang.
