Shillong, Risaw 11: Hato, yn pynlong Election noh ha GHADC hapoh 6 bnai kane ka long katkum ka jingthoh u Babu Kular Khongjirem. Ka kam jong ka District Council ha Garo Hills ka la thnam hi puk mynta ui bnai ym tang ba ka don ka jing shah kynnoh bamsap bad ka jingbym lah siew tulop ia ki nongtrei jongka mynta la palat 2 snem tam,hynrei khamtam eh ba ka por treikam jinglong MDC ruh ka la kut artad.
Ka jingdawa tokit ka seng BJP bad kiwei ki kynhun halor ka pisa ba la shu pyllut phut da ki bun klur da ka GHADC kam pat urlong satia namar ka state goverment ha Meghalaya la lamkhmat hi da kajuh ka party NPP kaba synshar ha GHADC,Tura.Kumno,u CEM bad ki EM ka GHADC kin nud ban shu leh kulmar ban shu pyllut phut bun spah klur ka pisa paidbah khlem don ka jingia tip bad jingia sngewthuh jingmut lang bad ki nongialam rangbah jong ka party.
Lada ki shu leh hi tang para ma ki ha GHADC, ki lah ban shah dumok bad shah mai ha ki nongialam rangbah jong ka party.Lada ki nongialam rangbah ka party NPP kim tip,ki dei wat ban pynshitom da kaba beh seng ia kito ki MDC jong ka kiba leh thok ne pynbudnam ia ka party jongki.Lada kam nud ban sei madan ia ki nongleh thok leh shukor.
Ka MDC election ha Garo Hills kan long kaba dum bad bym tikna shuh ia ka party NPP. Ha ka 12th October 2020,ki kot khubor ki la pynphriang khubor ba ka Cabinet kan ai ia ka rai halor ka kam GHADC.Ki don lai tylli ki rai ba ka Cabinet ha katei ka sngi kan rai.
Kawei ka long ban pynjari noh(imposed) da ka synshar Administrator hapoh 6 bnai bad pynkhreh artad ia ka Election hapoh 6 bnai.Kaba ar pat ki lah ban rai syndon da ka Election khnang ban lait ka kynrum kynram ia ka jingshah kren ne jingleh shiliang.
Khmat ka sorkar MDA ba la ialam da ka NPP halor ka Executive Committee ha GHADC ba la ialam hi da ka NPP.Kaba lai pat ka long ba ka cabinet ka lah ruh ban pynjlan shwa(extension) ia ka por(tenure) jong ki MDC khnang ba kin ioh bam tulop jem shwa sa katto katne bnai ioh ki shah rem noh bad ioh duh tulop ei kha-ma-kha.Kane kaba lai ka dei kaba ki kwah bad angnud eh ki MDC jong ka Garo Hills bad ki da ban jur ia u nongialam jong ki ba un pynjlan shwa na ka bynta ka jingmyntoi jongki.
Lada kane ka sorkar MDA hapoh ka jingialam ka NPP ka pynjlan(extend) biang ia ka por ki MDC,kan long hi thik kajuh ka raibi(bad precedence) kumba leh u Dr Mukul Sangma, san snem mynshwa, ha kato ka por ba u la dang long Chief minister ka Meghalaya ban pynjlan(extend) tang ban pynsngewbha ia ki MDC Congress jongu ha kito ki por.
Ki paidbah na kylleng ka ri lum Garo bad wat hangne ha ri Khasi-Jaintia jongngi ruh ki dang peit bha kliaw aiu une u NPP Chief minister uba mynta un ai ia ka rai ia kane ka kam GHADC ha ka 12th October 2020, la un ai ka rai kaba shah shiliang kaban pyn artatien ia ki paidbah jong ka jylla Meghalaya jongngi ne un ai rai ka rai kum u nong ialam ba shisha bad bym shah shiliang iano iano ruh(as a man of integrety).Hadien katei ka tarik ki paidbah kin sa shai lang baroh.
