Shillong, Nailar 04: Mynta ka sngi ka seng Jaintia Student Union (JSU) seng kmie kynthup ia ka shnat na Narpuh bad Khliehriat kila leit ban khynra ia ka khyrdop talasi mynder ha Ratacherra ha East Jaintia Hills District.
U President seng kmie ka JSU u samla Jersom Shylla , la ong ba kane ka jaka ka dei ka jaka mih lada leit sha Assam bad lada wan na Assam ka dei ka jaka rung sha Meghalaya, haba iohi ia ki jingjia ha Assam ba ka sorkar kala khynra ia ki mynder ri.
La ong ba katkum ka jingiohi ka jingshah kyndang kala kot sha ka 2000 tylli ki long iing bad haba shim ia ka jingbun briew kala jan kot sha ka 50000 ngut, dei na kane ka daw ba ka seng ka leit sha katei ka jaka ban tip aiu kane ka khyrdop ka leh.
Ha kane ka jingleit ka jong ki kila ioh ban bat katto katne ki kali kiba la ioh bad bad rah ia ki sha katei ka khyrdop talasi mynder ri, bad la shem ba ki briew kiba don ha katei ka jak kila leh ia kaba don kam namar la shah ban rung tang ia kiba biang kot bad ia ki bymbiang kot la phah phai noh.
Ha kawei ka bynta la ioh ba ka sorkar kala khot ia ka jingialang ha Shillong ha kaba ia dei bad kane ka bynta, kaba kyntup ia ki dorbar shnong, ki seng samla nalor ki ophisar, ki sengbhalang namar don kam ban ia treilang ha kane ka bynta.
Haba ia dei bad kine ki jak rung jaka mih ka seng ka kwah ban pynkhlain ia ki jingtalasi khamtam ha kine ki jaka kiba bun kiba ia rung ia mih, ka seng ka ain khublei ia u ba dei peit kila leh bha, kaba sngewtynnad eh ka long ba kim pdiang ia ki Aadhaar namar dei kiba shna thok, kaba ki pdiang dei ia ki dur thep vote.
Ka khubor kaba ka JSU ka phah sha ka sorkar jylla ka long ba dei ban don ia ka “Digital Checking” ban peit bad ban pynshisha ia ki dur thep vote jong ki, namar ioh kine ki dei ki mynder ia kata ruh ym lah ban ong, kumta ka sorkar ka dei ban leh ia kane.
Na ka liang ka seng kan dang iaid bteng ban leit ban jurip kumne kum ha ki bynta jong ka Saphai bad Khanduli, ki dorbar shnong ki dei ban peit bha namar ioh ki rung lyngba ka shongwai bad kine kin kylla trai shnong. Kaba kongsan ka long ban ioh ia ka ILP lada ioh kan pynsuk ia ki briew ban jurip balei pat ioh ia ka ILP.
