Shillong, Rymphang 24: Mynta ka sngi ki nongialam jong ka seng HYC seng kmie kila leit sha Langpih ban ai mynsiem ia ki paidbah kiba don ha katei ka thain kaba dang don ha pdeng ka jingiakam mar kylliang ha pdeng ka sorkar Meghalaya bad Assam.
Ha kane ka jingleit u Bah Robert June Kharjahrin president ka HYC u la ia kynduh ia ki paidbah nongshong shnong bad u la ia kynduh ia ka long kmie kaba la ieng rangbah ban khang ia ki pulit jong ka jylla Assam ha ka sngi kaba mut ban thaw jubor ia ka police out post ha Umawli.
U bah Robert u la ong ba kane ka jingwan ka long khongpong ha ka jaka ba kin wan ban ai mynsiem hynrei ki ioh na ki paidbah kane ka shnong ia ka mynsiem shlur kumba kila pynpaw ki ruh ki ioh ia ka mynsiem na ki.
Ha kane ka sngi u President jong ka seng HSPDP u bah KP Pangniang u ba dei u MLA barim jong kane ka jaka ruh u la ia don lang. Ha kane ka sngi ki paidbah nongshong shnong kila pyni sha ki nongialam jong ka HYC ia ki jaka ki shnong kiba don sawdong katei ka thain.
Ha kane ka jingleit ki nongialam jong ka HYC kila pynlong ruh ia ka jingialang paidbah ban ai mynsiem bad ban pynshngian ia ki briew kiba don ha katei ka thain kiba shah pyndik na ka por sha ka por ha ki pulit Assam.
Lah ban pynkynmaw ba kala don ka jingduh ei ia ki saw tylli ki mynsiem briew kiba la siat da ki pulit jong ka Assam ha ki snem kiba la dep. Kane ka jingpyndik jong ki pulit Assam sha katei ka jaka ka long na ka por sha ka por bad ka sorkar Asam kumba ka paw kam juh bat ia ka kular kaba la ia soi ha u snem 2010 ha pdeng kine ki ar tylli ki jylla ban nym pynthud ha khappud.
